'दूरस्थ'पासून विद्यार्थी दूर; 'आयडॉल'ची पटसंख्या घटली

म. टा. विशेष प्रतिनिधी मुंबई : मुंबई विद्यापीठाच्या दूर व मुक्त शिक्षण संस्थेतील (आयडॉल) विद्यार्थ्यांची घटती संख्या ही चिंतेची बाब असल्याचे मत गुरुवार आणि शुक्रवारी विद्यापीठात पार पडलेल्या अधिसभेत व्यक्त करण्यात आली. मात्र आता मुंबई विद्यापीठाला नॅककडून 'अ++' गुणांकन मिळाले आहे. यामुळे आता 'आयडॉल'चे सक्षमीकरण करण्याचा मानस विद्यापीठाने व्यक्त केला आहे. मुंबई विद्यापीठात नोकरी करून शिकणाऱ्या विद्यार्थ्यांसाठी किंवा महिलांना उच्च शिक्षण घेण्यासाठी दूर व मूक्त शिक्षण संस्था (आयडॉल) कार्यरत आहे. यामध्ये विद्यार्थ्यांना उच्च शिक्षणाची मोठी संधी असूनही गेल्या काही वर्षांपासून विद्यापीठाने 'आयडॉल'मध्ये एकही नवा अभ्यासक्रम सुरू केला नाही. परिणामी येथील विद्यार्थी संख्या घटत असल्याचे अधिसभा सदस्य व युवा सेना सदस्य अॅड. वैभव थोरात यांनी निदर्शनास आणले. गेल्या चार वर्षांपासून याबाबत बोलत आहे, तरीही विद्यापीठ हा प्रश्न गांभीर्याने घेत नसल्याची खंतही त्यांनी व्यक्त केली. २०१६-१७मध्ये आयडॉलमध्ये ८० हजार विद्यार्थी शिक्षण घेत होते, ही संख्या २०२०-२१मध्ये ६४ हजारापर्यंत आली. ही बाब खरोखरच चिंता करण्यासारखी असल्याचे थोरात यांनी सांगितले. त्यांच्या स्थगन प्रस्तावाला प्रदीप सावंत यांनी अनुमोदन दिले. तर 'आयडॉल'मधील विद्यार्थ्यांना ऑनलाइन शुल्क भरल्यानंतर पावती मिळत नाही. त्यामुळे 'आयडॉल'च्या खात्यामध्ये पैसे जमा झाले की नाही, हे कळत नाही. परिणाम त्यांना ऐन परीक्षेवेळी धावपळ करावी लागते, असा मुद्दा सुप्रिया करंडे यांनी समोर आणला. विद्यार्थ्यांना उच्च शिक्षण देणारी हक्काची संस्था असलेल्या 'आयडॉल'ला सक्षम करण्याच्या मुद्द्याकडे विद्यापीठ प्रशासन गांभीर्याने पाहत नसल्याची खंतही यावेळी व्यक्त करण्यात आली. नवीन अभ्यासक्रम, पदभरतीची ग्वाही या चर्चेस उत्तर देताना, येत्या काळात विद्यापीठ प्रशासन 'आयडॉल'च्या सक्षमीकरणासाठी पावले उचलणार असल्याचे कुलगुरू डॉ. सुहास पेडणेकर यांनी स्पष्ट केले. 'आयडॉल'मधील विद्यार्थ्यांची संख्या वाढवण्यासाठी विद्यापीठाकडून प्रयत्न करण्यात येत आहेत. पुढील वर्षी काही नवीन अभ्यासक्रम सुरू करण्यात येणार आहेत. 'आयडॉल'च्या विद्यार्थ्यांना ऑनलाइन पद्धतीने शिक्षण देण्याबरोबरच त्यांच्यासाठी आयटी प्लॅटफॉर्म उभारणे हे उद्दिष्ट असल्याचेही त्यांनी सांगितले. नवीन अभ्यासक्रम वाढवताना कमी असलेल्या शिक्षकांची पदे नियमित तत्त्वावर भरण्यात येणार असल्याची माहितीही त्यांनी यावेळी दिली. दूरस्थ विद्यार्थ्यांची संख्या २०१६-१७ ८० हजार २०२०-२१ ६४ हजार भूमिका सक्षमीकरण गरजेचे मुंबई विद्यापीठातून पदवी घेणे हे प्रत्येक तरुणाचे स्वप्न असते. मात्र अनेकदा आर्थिक, सामाजिक परिस्थितीमुळे अनेकांना नियमित कॉलेजमध्ये जाऊन शिक्षण घेणे जमत नाही. अशा विद्यार्थ्यांना दूर व मुक्त शिक्षणाच्या माध्यमातून संधी मिळावी, या उद्देशाने 'आयडॉल'ची स्थापना झाली. मात्र या संस्थेतून शिक्षण घेणाऱ्या विद्यार्थ्यांकडे पाहण्याचा समाजाचा दृष्टिकोनही वेगळा आहे. हा दृष्टिकोन बदलायचा असेल, तर संस्थेतील शिक्षणाचा दर्जा वाढविणे आवश्यक आहे. असे झाले, तरच विद्यार्थी संख्या वाढेल आणि अनेक वंचित विद्यार्थ्यांना उच्च शिक्षणाची दारे खुली होतील. यासाठी 'आयडॉल' प्रशासन वेगवेगळे प्रयोग करत असले, तरी ते अधिक प्रभावीपणे करणे आवश्यक आहे.

from Career News in Marathi: Career News, मराठी Career बातम्या | Maharashtra Times https://ift.tt/3Ap0sNy
via IFTTT