NEET UG: तिसऱ्या टप्प्यातील प्रवेश प्रक्रियेला सुरुवात, 'येथे' करा नोंदणी

NEET UG: देशभरातील वैद्यकीय महाविद्यालयांमध्ये तिसऱ्या टप्प्यातील प्रवेश प्रक्रिया आजपासून सुरु झाली आहे. प्रवेशाचा हा शेवटचा टप्पा आहे. त्यानंतर २८ मार्च रोजी रिक्त जागांचा तपशील जाहीर केला जाईल. नीट यूजीचे काऊन्सेलिंग ( Counselling) करणार्‍या वैद्यकीय समुपदेशन समितीने (Medical Counseling Committee, MCC) दिलेल्या माहितीनुसार, कॉलेजकडून बुधवार आणि गुरुवारी जागांचे तपशील तयार केले जातील. यानंतर १० ते १४ मार्चपर्यंत नोंदणीसह शुल्क भरण्याची सुविधा असणार आहे. विद्यार्थ्यांना दुपारी १२ वाजेपर्यंत नोंदणी करता येणार असून दुपारी ३ वाजेपर्यंत फी भरता येणार आहे. वेळापत्रकानुसार नोंदणी प्रक्रिया पूर्ण केल्यानंतर विद्यार्थी दुसऱ्याच दिवशी निवडी भरू शकतात. भरलेले पर्याय लॉक करण्यासाठी १४ मार्च रात्री ११. ५५ पर्यंत वेळ देण्यात आला आहे. ही प्रक्रिया पूर्ण झाल्यानंतर १५ आणि १६ मार्च रोजी कागदपत्रांची पडताळणी केली जाणार आहे. त्यानंतर १७ आणि १८ मार्च रोजी जागावाटपाची प्रक्रिया होणार आहे. १९ मार्च रोजी अंतिम निकाल जाहीर होणार आहे. निकाल जाहीर झाल्यानंतर विद्यार्थ्यांना २० ते २७ मार्च या कालावधीत महाविद्यालयांना कळवावे लागणार आहे. त्यानंतरच जागा निश्चित होईल. १० मार्चपासून मॉप-अप फेरी काऊन्सेलिंग २०२१ साठी एमसीसीने जाहीर केलेल्या वेळापत्रकानुसार, काऊन्सेलिंगच्या दोन फेऱ्यांची प्रक्रिया २७ फेब्रुवारी रोजी संपल्यानंतर मॉप-अप फेरी आयोजित करण्यात आली. या फेरीसाठी कॉलेजांना ८ आणि ९ मार्चपर्यंत सीट मॅट्रिक्सची पडताळणीसाठी वेळ देण्यात आला. उमेदवार १० ते १४ मार्च २०२२ या कालावधीत या फेरीसाठी ऑनलाइन नोंदणी करू शकतील. उमेदवारांना त्यांची सीट चॉईस फिलिंग आणि चॉइस लॉकिंग देखील या तारखांपर्यंतच करावी लागेल. या फेरीचे नीट यूजी काऊन्सेलिंग २०२१ चे निकाल १९ मार्च रोजी जाहीर केले जाणार आहेत आणि उमेदवार मायग्रेशन सर्टिफिकेटशिवाय २० ते २७ मार्च २०२२ पर्यंत वाटप केलेल्या महाविद्यालयात अहवाल देऊ शकतील. एमसीसीच्या सूचनेनुसार, यापुढे उमेदवारांना पदवीसाठी मायग्रेशन सर्टिफिकेट सादर करणे बंधनकारक राहणार नाही. देशातील अनेक उमेदवारांना महाविद्यालयांमध्ये मायग्रेशन सर्टिफिकेटच्या मागणीमुळे प्रवेश घेण्यात अडचण येत असते. त्यातून सवलत देण्याची मागणी विविध सोशल मीडिया प्लॅटफॉर्मद्वारे केली जात होती. तात्पुरता प्रवेश मेडिकल काऊन्सेलिंग कमेटीने मायग्रेशन सर्टिफिकेटबाबत दिलेल्या नियमांमध्ये उमेदवारांना तात्पुरता दिलासा दिला आहे. देशभरातील महाविद्यालयांनी मायग्रेशन सर्टिफिकेट नसेल तर उमेदवारांना प्रवेश नाकारू नये आणि त्यांना मायग्रेशन सर्टिफिकेट सादर करण्यासाठी जास्तीत जास्त ७ दिवसांचा कालावधी देऊन त्यांना तात्पुरता प्रवेश द्यावा, अशी सूचना एमसीसीने केली आहे. मायग्रेशन सर्टिफिकेटशिवायही नीट यूजी काऊन्सेलिंग २०२१ अंतर्गत वाटप केलेल्या महाविद्यालयात अहवाल देऊन तात्पुरता प्रवेश घेतला जाऊ शकतो.

from Career News in Marathi: Career News, मराठी Career बातम्या | Maharashtra Times https://ift.tt/lxDjhWX
via IFTTT