दहावी परीक्षा: शेवटची उजळणी 'अशी' करा

नागपूर: दहावीची परीक्षा आता अवघ्या काही दिवसांवर आली आहे. या शेवटच्या काही दिवसांमध्ये विद्यार्थ्यांनी दहावीच्या परीक्षेची व्यवस्थित तयारी केली पाहिजे. या परीक्षेला विद्यार्थ्यांनी अत्यंत सकारात्मकतेने सामोरे जावे. योग्य प्रयत्न आणि स्वत:वरील विश्वास या दोन गोष्टींकडे विद्यार्थ्यांनी लक्ष द्यावे. हे केल्यास त्यांना परीक्षेत यश मिळाल्याशिवाय राहणार नाही. शेवटच्या काही दिवसांमध्ये आता योग्य वेळापत्रक केले पाहिजे. त्या वेळापत्रकानुसार अभ्यास करावा आणि परीक्षेची तयारी करावी. या परीक्षेच्या काळात सर्व विद्यार्थ्यांनी स्वत:ला शांत ठेवण्याचा प्रयत्न करावा. आपले मन प्रसन्न ठेवले तर त्याचा अभ्यासावर आणि परीक्षेच्या तयारीवर चांगला परिणाम पडतो. या काळात शांतपणे झोप घ्यावी. झोप चांगली झाल्यास मेंदूची काम करण्याची क्षमता वाढते. पेपर देताना त्यामुळे अधिक लक्षपूर्वक आणि एकाग्रतेने पेपर सोडविण्यास मदत होते. वर्षभर केलेल्या अभ्यासाची उजळणी करण्यावर आता भर द्यायला हवा. अभ्यासक्रमातील जो भाग आपल्याला कठीण वाटतो, त्याकडे थोडे अधिक लक्ष देऊन त्याची व्यवस्थित उजळणी करावी. आपल्याला काय येते आणि काय नाही, काय आठवत नाही, याकडे लक्ष दिले पाहिजे. पेपरच्या दिवशीदेखील जलद उजळणी केली पाहिजे. दहावीची परीक्षा ही पहिली महत्त्वाची परीक्षा आहे, पण अंतिम नव्हे. त्यामुळे, या परीक्षेचे अनावश्यक दडपण न घेता या परीक्षेला विद्यार्थ्यांनी सामोरे जावे. येणाऱ्या परीक्षेतील उत्तम यशासाठी सर्व विद्यार्थ्यांना शुभेच्छा. परीक्षेसाठी महत्त्वाच्या बाबी... - पेपर सोडविताना वेळेचे योग्य व्यवस्थापन करा. - भाषेसारख्या पेपर्सना अनेकांना वेळ पुरत नाही. हे लक्षात घेऊन पेपर सोडविताना वेळेकडे लक्ष द्या. - प्रश्नपत्रिकेचे व्यवस्थित वाचन करा, प्रश्नांचे स्वरूप समजून घ्या आणि नंतर पेपर सोडविण्यास सुरुवात करा. - परीक्षेकरिता लागणारे सर्व साहित्य, प्रवेशपत्र बरोबर घेतले आहे किंवा नाही हे समजून घ्या. - आपल्या उत्तरांमधून महत्त्वाचे मुद्दे अधोरेखित करा. - पेपरकरिता परीक्षा केंद्रावर वेळेत पोहोचा. (दहावीच्या परीक्षेची अखेरच्या टप्प्यात कशी तयारी करावी, याबद्दल विद्यार्थ्यांना उपयुक्त मार्गदर्शन केले आहे आर. एस. मुंडले इंग्लिश स्कूल आणि ज्युनियर कॉलेजच्या प्राचार्य वर्षा चांगदे यांनी) आणखी वाचा :

from Career News in Marathi: Career News, मराठी Career बातम्या | Maharashtra Times https://ift.tt/2w15IeQ
via IFTTT