करोना: सीबीएसईच्या विद्यार्थ्यांना मास्क वापरण्याची परवानगी

नवी दिल्ली: विषाणूच्या फैलावाच्या पार्श्वभूमीवर केंद्रीय माध्यमिक शिक्षण मंडळ अर्थात सीबीएसईने दहावी आणि बारावीच्या विद्यार्थ्यांना आणि अन्य कर्मचाऱ्यांना परीक्षेच्या वेळी मास्क आणि सॅनिटायजर्स वापरण्याची परवानगी दिली आहे. दरम्यान, केंद्रीय मनुष्यबळ विकास मंत्रालयाच्या सचिवांनी सीबीएसई आणि अन्य राज्यांना करोनासंदर्भात शालेय विद्यार्थ्यांमध्ये जनजागृती करण्यासंबंधी लेखी सूचनाही केल्या आहेत. सीबीएसईने सर्व परीक्षा केंद्रांना यापूर्वीच सांगितलंय की मुलांना खबरदारी म्हणून मास्क वापरू द्या. केंद्रीय मनुष्यबळ विकास मंत्रालयाचे सचिव अमित खरे यांनी सीबीएसई आणि अन्य राज्यांना करोनासंदर्भात लिहिलेल्या पत्रात म्हटलंय, 'विद्यार्थ्यांमध्ये जनजागृती करा. त्यांना सातत्याने हात धुणे, खोकताना, शिंकताना तोंडावर रुमाल घेणे, आजारी असताना गर्दीत जाणे टाळणे आदी खबरदारीच्या उपायांबाबत जनजागृती करा.' दरम्यान, सीबीएसई बोर्डाच्या परीक्षांमध्ये यंदा विविध अडथळे येत आहेत. दिल्लीतील ईशान्य भागात अनेक केंद्रांवर तेथील हिंसाचाराच्या पार्श्वभूमीवर परीक्षा लांबणीवर पडल्या आहेत. त्यातच दिल्लीत करोना विषाणूच्या फैलावाच्या भीतीमुळेही प्रशासन अलर्ट आहे. दरम्यान, मंगळवारपर्यंत एकट्या चीनमध्ये करोनाचे २९८१ बळी तर जगभरात ३१०० पर्यंत पोहचली आहे. सीबीएसई बोर्डाच्या दहावी आणि बारावीच्या परीक्षा शनिवारी १५ फेब्रुवारीपासून सुरु झाल्या आहेत. दहावीची परीक्षा २० मार्च तर बारावीची परीक्षा ३० मार्चपर्यंत सुरू राहणार आहे.

from Career News in Marathi: Career News, मराठी Career बातम्या | Maharashtra Times https://ift.tt/2VMVZUi
via IFTTT