'या' विद्यापीठात होणार करोनावर अभ्यासक्रम

नवी दिल्ली: जगभरात विषाणूने हाहाकार माजवला आहे. चीन, अमेरिकेपासून भारतापर्यंत अनेक देश या विषाणूवरची मात्रा शोधण्याचा प्रयत्न करत आहेत. रोज नवनवे शोध आणि अभ्यास समोर येत आहेत. या पार्श्वभूमीवर भारतातही या विषाणूवर एक अभ्यासक्रम सुरू होणार आहे. जगातील १६० हून अधिक देश आणि दोन लाखांहून अधिक लोक या विषाणूच्या विळख्यात सापडले आहेत. या विषाणूवर अभ्यासक्रम सुरू करणारा भारत हा पहिला देश आहे. उत्तर प्रदेश राज्यातील चौधरी चरण सिंह युनिव्हर्सिटीत हा कोर्स सुरू होणार आहे. मेरठ येथील या विद्यापीठाचे कुलगुरू एन. के. तनेजा आहेत. या अभ्यासक्रमात सार्स आणि करोना व्हायरसचा अभ्यास सुरू होणार आहे. या विद्यापीठात सुरू असलेल्या एक वर्ष मुदतीच्या डिझास्टर मॅनेजमेंट डिप्लोमा कोर्समध्ये या अभ्यासाचा समावेश करण्यात येणार आहे. यासाठी अभ्यासक्रम बनवण्याची जबाबदारी विद्यापीठाने झुऑलॉजी, बॉटनी आणि एनव्हायर्नमेंटल सायन्स विभागप्रमुखांवर सोपवली आहे. डिझास्टर मॅनेजमेंटचा संपूर्ण कोर्स दोन सत्रातील असेल. यात पहिल्या सत्रात पूर, वादळ, त्सुनामीसारखे विषय असतील, दुसऱ्या सत्रात नोवेल करोनाव्हायरसवरील अभ्यास शिकवला जाणार आहे. विद्यापीठाचं म्हणणं असं आहे की विज्ञान शाखेतील तीन वेगवेगळ्या कोर्सेसमध्ये देखील विद्यार्थ्यांना करोना व्हायरसविषयीचा अभ्यास सुरू करण्यात येईल. कुलगुरू एन. के. तनेजा म्हणाले, 'हा अभ्यासक्रम पुढील दोन महिन्यांत सुरू करण्याची तयारी सुरू आहे. यासाठी परवानगीदेखील मिळाली आहे. विद्यापीठाच्या विद्या परिषदेपुढे हा प्रस्ताव मान्यतेसाठी ठेवण्यात येईल. अभ्यासक्रमाचं शुल्क किती असेल, हे अद्याप ठरवण्यात आलेलं नाही.' करोना व्हायरसवर स्टडी मटेरिअल तयार केलं जाईल आणि डिप्लोमा कोर्सशी तो जोडण्यात येईल.

from Career News in Marathi: Career News, मराठी Career बातम्या | Maharashtra Times https://ift.tt/2QucGjX
via IFTTT