IITच्या वैज्ञानिकांनी बनवला डिजिटल स्टेथोस्कोप

म. टा. विशेष प्रतिनिधी, मुंबई रुग्णाला तपासण्यासाठी सर्वच डॉक्टर स्टेथोस्कोपचा वापर करतात. पण, सध्या करोना संसर्गाच्या भीतीने त्याचा वापर करणे धोक्याचे मानले जात असताना, मुंबई आयआयटीच्या वैज्ञानिकांनी एका स्मार्ट डिजिटल स्टेथोस्कोपची निर्मिती केली आहे. या स्टेथोस्कोपच्या मदतीने हृदयाचे ठोके रुग्णाच्या जवळ न जाताही ऐकता येतात. त्यामुळे डॉक्टरांना करोना विषाणूचा संसर्ग होण्याची भीती कमी होते. रुग्णाच्या छातीत उमटणाऱ्या हृदयांच्या ठोक्यांचा आवाज वायरलेस पद्धतीने डॉक्टर ऐकू शकतात. त्यासाठी ब्लुटूथचा वापर केला जातो. त्यामुळे रुग्णाजवळ जाण्याची गरज भासत नाही. मुंबई आयआयटीच्या चमूने या डिजिटल स्टेथोस्कोपसाठी पेटंट घेतले असून, यात हृदयाच्या ठोक्याचा आवाज नोंद करण्याचीही सोय आहे. 'आयुडिव्हाइस' या स्टार्टअपने असे एक हजार स्मार्ट डिजिटल स्टेथोस्कोप विविध रुग्णालयांना पाठवले आहेत. रिलायन्स रुग्णालय व पीडी हिंदुजा रुग्णालय यांच्या वैद्यकीय डॉक्टरांशी चर्चा करून हा स्टेथोस्कोप तयार केला आहे. या स्टेथोस्कोपची निर्मिती करणाऱ्या आदर्शा के यांनी सांगितले की, करोना संसर्ग असलेल्या रुग्णांत छातीतील आवाज ऐकणे महत्त्वाचे आहे. कारण या रुग्णांच्या श्वसनात अनेक अडथळे येत असतात. या स्टेथोस्कोपने छातीतील आवाज ऐकता येतात. या स्टेथोस्कोपमध्ये दोन कानांमध्ये अडकवण्याची नळी आहे. त्यातून शरीरातील अनेक आवाज मोठे करूनही ऐकता येतात. त्यांचे इलेक्ट्रॉनिक संदेशात रूपांतर करता येते. फोनोकार्डिओग्रामवर रुग्णाच्या हृदयाचे व छातीतील इतर आवाज दाखवता येतात. ते स्मार्ट फोन किंवा लॅपटॉपवर आलेखाच्या रूपात पाहता येतात. स्टेथोस्कोपचे फायदे - रुग्णाजवळ न जाता हृदयाचे ठोके व छातीतील आवाज ऐकता येतात. - या आवाजांचे ध्वनिमुद्रण करून रुग्णांमधील गुंतागुंतीच्या आजारात अन्य डॉक्टरांचा सल्ला घेण्यासाठी ते त्यांना ऐकवता येतात. - हृदयाचे ठोके व छातीतील इतर आवाज हे यात मोठे करून ऐकता येतात. - हृदयाच्या ठोक्यांचा आलेखही इलेक्ट्रॉनिक पद्धतीने काढता येतो.

from Career News in Marathi: Career News, मराठी Career बातम्या | Maharashtra Times https://ift.tt/3caUZhA
via IFTTT