लॉकडाऊननंतरची MPSC पूर्व परीक्षाही लांबणीवर

नोवेल व्हायरसचा वाढता प्रादुर्भाव रोखण्याकरिता राज्यात लॉकडाऊन आणि अन्य विविध उपाययोजना सुरू आहेत. या पार्श्वभूमीवर २६ एप्रिल व १० मे रोजी होणाऱ्या महाराष्ट्र राज्यसेवा आयोगाच्या पूर्व परीक्षा पुढे ढकलण्यात आल्या आहेत. २६ एप्रिल २०२० रोजी राज्यसेवा पूर्व परीक्षा २०२० आणि १० मे २०२० रोजी महाराष्ट्र दुय्यम सेवा अराजपत्रित (गट- ब) संयुक्त पूर्व परीक्षा २०२० होणार होती. या दोन्ही परीक्षा आता लॉकडाऊन स्थिती आणि एकूणच करोनाच्या संसर्गामुळे उद्भवलेल्या स्थितीमुळे पुढे ढकलण्यात येत असल्याचे आयोगाने आज एका प्रसिद्धीपत्रकाद्वारे जाहीर केले. या दोन्ही परीक्षांच्या सुधारित तारखा यथावकाश आयोगाच्या संकेतस्थळावर घोषित करण्यात येतील. तसेच परीक्षेच्या तारखा निश्चित झाल्यानंतर उमेदवारांना त्यांच्या आयोगाकडील नोंदणीकृत दूरध्वनी क्रमांकावर एस.एम.एस. द्वारे अवगत करण्यात येईल, असेही आयोगाने स्पष्ट केले आहे. दरम्यान, यापूर्वी ५ एप्रिल रोजी होणार असलेली राज्यसेवा आयोगाची परीक्षाही पुढे ढकलण्यात आली होती.

from Career News in Marathi: Career News, मराठी Career बातम्या | Maharashtra Times https://ift.tt/2XeEb4Z
via IFTTT