पहिली ते आठवीच्या अभ्यासासाठी सह्याद्रीवर 'टिलीमिली'!

करोना महामारीच्या फैलावामुळे देशात २४ मार्चला लॉकडाऊन पुकारण्यात आला होता. तेव्हापासून सर्व शाळा, महाविद्यालये बंद आहेत. विद्यार्थ्यांचे ऑनलाइन पद्धतीने शिक्षण शाळांनी सुरू केले असले तरी देशात असलेली खूप मोठी डिजीटल दरी यामुळे समोर आली आहे. महाराष्ट्रातही शालेय शिक्षण विभागाकडून शिक्षणाचे विविध पर्याय अवलंबिले जात आहेत. गरीब वर्गातील, ग्रामीण भागातील अनेक विद्यार्थ्यांच्या शिक्षणात मात्र 'स्मार्ट' मोबाइल, इंटरनेटअभावी अडचणींचा पाढा सुरू आहे. अशातच महाराष्ट्र नॉलेज कॉर्पोरेशन (एमकेसीएल) ही पुण्यातील स्वयंसेवी संस्था पहिली ते आठवीच्या मराठी माध्यमाच्या विद्यार्थ्यांसाठी 'टिलीमिली' नावाची मालिका दूरदर्शनच्या सह्याद्री वाहिनीवर सुरू करणार आहे. ही मालिका बालभारतीच्या पाठांवर बेतलेली आहे. राज्यातील सुमारे दीड कोटी विद्यार्थ्यांना याचा लाभ होईल असा एमकेसीएलचा दावा आहे. ही मालिका २० जुलैपासून सकाळी ७.३० ते दुपारी १२.३० वाजेपर्यंत प्रसारित केली जाणार आहे. 'टिलीमिली' मालिका बालभारतीच्या इयत्ता पहिली ते आठवी अभ्यासक्रमातील सर्व पाठांवर आधारित असणार आहे. यामध्ये विद्यार्थ्यांना कंटाळवाणी वाटणारी व्याख्याने नसतील, विद्यार्थ्यांना परिसरात करून बघता येतील असे कृतिशील शैक्षणिक अनुभव कसे घेता येतील यावर या मालिकेमध्ये माहिती दिली जाणार आहे. ही मालिका २० जुलै ते २६ सप्टेंबर २०२० या कालावधीत प्रसारित केली जाईल. मालिकेचे एकूण ४८० भाग आहेत. प्रत्येक इयत्तेचा एक पाठ एका भागात असेल. प्रत्येक इयत्तेचे एकूण ६० भाग दाखवण्यात येणार आहेत. रविवार वगळता दररोज सकाळी ७.३० ते दुपारी १२.३० या वेळात ही मालिका पाहता येईल. मालिकेचे वेळापत्रक पुढीलप्रमाणे राहील - वेळ -- इयत्ता सकाळी ७.३० ते ८.०० -- आठवी सकाळी ८.०० ते ८.३० -- सातवी सकाळी ९.०० ते ९.३० -- सहावी सकाळी ९.३० ते १०.०० -- पाचवी सकाळी १०.०० ते १०.३० -- चौथी सकाळी १०.३० ते ११ -- तिसरी सकाळी ११.३० ते दुपारी १२ -- दुसरी दुपारी १२ ते १२.३० -- पहिली या मालिकेबाबत माहिती देण्यासाठी जारी केलेल्या निवेदनात एमकेसीएलचे प्रमुख विवेक सावंत म्हणाले, 'टिलीमिली मालिका मुलं आपल्या पालकांसोबत घरी बसून पाहू शकतील. शिवाय यातील भागांमध्ये विद्यार्थ्यांना स्वेच्छेने शिकवणाऱ्या काही व्यक्तींबद्दल देखील माहिती देण्यात आली आहे. ही अनेक ठिकाणी झोपडपट्टी, गल्ली, वस्त्यांमध्ये असं काम करू इच्छिणाऱ्या लोकांना प्रेरणा देईल.' एमकेसीएल नॉलेज फाउंडेशनला शैक्षणिक कामांचा अनुभव आहे. शिवाय ग्राममंगल या संस्थेचे सहकार्य या मालिकेसाठी घेण्यात आले आहे. ग्राममंगल ही पुण्यातील संस्था आनंददायी अध्ययन-अध्यापनाच्या अनेक उपक्रमांसाठी प्रसिद्ध आहे.

from Career News in Marathi: Career News, मराठी Career बातम्या | Maharashtra Times https://ift.tt/2ZOyBpP
via IFTTT