दहावी, बारावीचा निकाल कधी? शिक्षणमंत्र्यांनी दिली माहिती

महाराष्ट्र राज्य माध्यमिक आणि उच्च माध्यमिक शिक्षण मंडळाचा इयत्ता दहावी आणि बारावीच्या निकालाची प्रतीक्षा लवकरच संपणार आहे. राज्याच्या शालेय शिक्षणमंत्री वर्षा गायकवाड यांनी ही माहिती दिली. गायकवाड या हिंगोली येथे एका वृत्तवाहिनीशी बोलत होत्या. त्यांनी आयसीएसईच्या निकालाच्या पार्श्वभूमीवर विद्यार्थ्यांना शुभेच्छाही दिल्या. त्यावेळी राज्यातल्या निकालांविषयी त्यांना प्रश्न विचारण्यात आला. त्या म्हणाल्या, 'बारावीचा निकाल १५ ते २० जुलैच्या दरम्यान लागणार आहे तर बारावीचा निकाल जुलैच्या अखेरीच्या आठवड्यात जाहीर होणार आहे.' राज्य माध्यमिक आणि उच्च माध्यमिक शिक्षण मंडळाद्वारे घेण्यात येणारी दहावीची परीक्षा मार्च मध्ये झाली. एकूण १७ लाख ६५ हजार ८९८ विद्यार्थ्यांनी दहावीच्या परीक्षेला नोंदणी केली होती. गेल्या वर्षीच्या तुलनेत यंदा विद्यार्थीसंख्या ६५ हजार ८५ ने वाढली आहे. दरम्यान, दहावीच्या भूगोल विषयाची परीक्षा करोनामुळे पुकारण्यात आलेल्या लॉकडाऊनच्या पार्श्वभूमीवर रद्द करण्यात आली होती. याविषयासाठी विद्यार्थ्यांना सरासरी गुण देण्यात येणार आहेत. बारावीची परीक्षा फेब्रुवारी महिन्यात पार पडली. राज्यभरात एकूण १५ लाख ५ हजार २७ विद्यार्थी बारावीच्या परीक्षेला बसले होते. परीक्षेसाठी नोंदणी केलेल्या एकूण १५,०५,०२७ विद्यार्थ्यांपैकी ८,४३,५५२ विद्यार्थी तर ६,६१,३२५ विद्यार्थिनी आहेत. राज्यभर एकूण ३,०३६ परीक्षा केंद्रांवर परीक्षा पार पडली होती. दरम्यान, आयसीएसई बोर्डाचा दहावी आणि बारावीचा निकाल शुक्रवारी १० जुलै रोजी दुपारी ३ वाजता जाहीर होणार आहे. काही विषयांचे ऑनलाइन पूनर्मूल्यांकन उच्च माध्यमिक प्रमाणपत्र म्हणजेच बारावी परीक्षांच्या ऑनलाइन निकालानंतर विद्यार्थ्यांना गुणपडताळणी, उत्तरपत्रिकेची छायाप्रत प्रचलित पद्धतीनुसार विहीत शुल्कासह उपलब्ध करून देण्यात येते त्यानंतर उत्तरपत्रिका छायाप्रतीची मागणी करणारे विद्यार्थी पुनर्मूल्यांकनासाठी अर्ज करतात तथापि ऑनलाइन पद्धतीने परीक्षा होणाऱ्या विषयांसाठी उत्तरपत्रिकेचे पुनर्मूल्यांकन करून देण्याची कार्यपद्धती नव्हती. फेबुवारी-मार्च २०२० परीक्षेपासून ऑनलाइन पद्धतीने घेण्यात येणाऱ्या विषयांच्या उत्तरपत्रिकेचे पुनर्मूल्यांकन करून देण्यात येणार आहे, अशी माहिती राज्य मंडळाने दिली आहे.

from Career News in Marathi: Career News, मराठी Career बातम्या | Maharashtra Times https://ift.tt/3iMU4Ij
via IFTTT