डीयूच्या ओपन बुक परीक्षा ऑगस्टपर्यंत लांबणीवर

Exams Postponed: कोविड - १९ महामारीमुळे देशातील परिस्थिती गंभीर आहे. करोनामुळे शिक्षण क्षेत्रावरही मोठा परिणाम झाला आहे. अशा वातावरणात परीक्षा घेणे विद्यापीठांसाठीही एक मोठे आव्हान ठरत आहे. दिल्ली विद्यापीठाने शिक्षक, विद्यार्थ्यांचा रोष अंगावर घेत ओपन बुक एक्झाम () घेण्याचा निश्चय केला होता. पण बिघडलेल्या स्थितीच्या पार्श्वभूमीवर विद्यापीठा १० जुलैपासून सुरू होणाऱ्या या परीक्षा आता ऑगस्टपर्यंत स्थगित केल्या आहेत. विद्यापीठाने दिल्ली उच्च न्यायालयाला सांगितले की विद्यापीठाने अंतिम वर्षाच्या परीक्षा स्थगित करण्याचा निर्णय घेतला आहे. १० जुलैपासून या ओपन बुक टेस्ट होणार होत्या. त्या आता ऑगस्टमध्ये होतील. या ऑनलाइन ओपन बुक एक्झाम (OBE) ला विद्यार्थी आणि शिक्षकांचा जोरदार विरोध सुरू होता. पण सर्व विरोध झुगारत परीक्षा घेण्यावर विद्यापीठ ठाम होते. अंतिम वर्षाच्या विद्यार्थ्यांसाठी ऑनलाइन ओपन बुक परीक्षा घेण्याचा निर्णय विद्यापीठाने घेतला होता. याआधीही या परीक्षा दहा दिवसांसाठी पुढे ढकलण्यात आल्या होत्या. दरम्यान, या परीक्षांच्या तयारीसाठी मॉक टेस्टचे शनिवारी ४ जुलै रोजी आयोजन करण्यात आले होते. पण ते अयशस्वी ठरले. अनेक विद्यार्थ्यांना प्रश्नपत्रिका डाऊनलोड करून लिहून पुन्हा अपलोड करण्यात खूप अडथळे आले होते. काय आहे ओपन बुक एक्झामिनेशन? ओबीई अर्थात ओपन बुक एक्झामिनेशनमध्ये विद्यार्थ्यांना ऑनलाइन प्रश्नपत्रिका दिली जाते. ती विद्यार्थ्यांना डाऊनलोड करावी लागते. पेपर सोडवण्यासाठी दोन तासांचा अवधी दिला जातो तर प्रश्नपत्रिका डाऊनलोड आणि शेवटी उत्तरपत्रिका अपलोड करण्यासाठी एक तासाचा अवधी दिला जातो. दिव्यांग विद्यार्थ्यांसाठी हा संपूर्ण वेळ ५ तासांचा असतो. या परीक्षेसाठी विद्यार्थी पुस्तके, नोट्स किंवा अन्य स्टडी मटेरियलच्या मदतीने परीक्षा देऊ शकतात. परीक्षा सुरू होताच तीन तासांच्या आत विद्यार्थ्यांना ती सोडवून उत्तरपत्रिका पोर्टलवर अपलोड करायची असते.

from Career News in Marathi: Career News, मराठी Career बातम्या | Maharashtra Times https://ift.tt/2DgM9CF
via IFTTT