IIT प्रवेश: विद्यार्थ्यांना मोठा दिलासा; 'ही' अट शिथील

Updates: यावर्षी करोना विषाणूच्या संक्रमणामुळे देशभरात लॉकडाऊन आहे. परिणामी देशातील अनेक राज्यांच्या बोर्डाच्या बारावीच्या परीक्षा अंशत: रद्द करण्यात आल्या आहेत. या सर्व पार्श्वभूमीवर इंडियन इन्स्टिट्यूट ऑफ टेक्नॉलॉजी (आयआयटी) मध्ये प्रवेशाच्या अटींमध्येही सवलत देण्यात आली आहे. जॉइंट एक्झाम बोर्डाने हा निर्णय घेतला आहे. यावर्षी बारावी उत्तीर्ण झालेल्या विद्यार्थ्यांना यामुळे मोठा दिलासा मिळाला आहे. काय आहे ही शिथिलता जाणून घ्या... आयआयटींमधील प्रवेशांसाठी जेईई मेन, जेईई अॅडव्हान्स्ड या परीक्षा उत्तीर्ण व्हाव्या लागतात. जेईई मेन उत्तीर्ण झालेले विद्यार्थी अॅडव्हान्स्डसाठी पात्र ठरतात. मात्र जेईई अॅडव्हान्स्ड परीक्षा क्लिअर केल्यानंतरदेखील विद्यार्थ्यांचे बारावी परीक्षेतील गुणदेखील ग्राह्य धरले जातात. बारावीत ७५ टक्के किंवा टॉप २० पर्सेंटाइल गुण आवश्यक असतात. यावर्षी ही अट शिथील करण्यात आली आहे. म्हणजेच विद्यार्थ्यांचे बारावी परीक्षेचे गुण ग्राह्य धरले जाणार नाहीत. मात्र दोन गोष्टी अनिवार्य असतील. त्या म्हणजे एक तर बारावीची परीक्षा द्यावी लागेल आणि जेईई अॅडव्हान्स्ड परीक्षा देखील क्लिअर करावी लागेल. मात्र प्रवेशांच्या वेळी १२ वीतल्या गुणांच्या अनिवार्यतेतून सवलत मिळेल. शुक्रवारी सायंकाळी उशिरा केंद्रीय मनुष्यबळ विकास मंत्री रमेश पोखरियाल यांनी ट्विट करत ही माहिती दिली. हेही वाचा: आयआयटी प्रवेशासाठी अटी काय आहेत? सर्वसाधारणपणे आयआयटीत प्रवेशासाठी जेईई अॅडव्हान्स्ड परीक्षा उत्तीर्ण व्हावी लागते. याव्यतिरिक्त बारावीत किमान ७५ टक्के गुण किंवा टॉप २० पर्सेंटाइल अनिवार्य असते. एससी आणि एसटी विद्यार्थ्यांना बारावीत किमान ६५ टक्के गुण आणि टॉप २० पर्सेंटाइल अनिवार्य आहेत. मात्र यावर्षी करोनामुळे सीबीएसई, आयसीएसई बोर्डांनी दहावी, बारावीच्या परीक्षा रद्द केल्या आहेत. दोघांनी बोर्डाच्या अन्य परीक्षांसाठी मूल्यांकनाच्या विशिष्ट पद्धतींचा अवलंब केला आहे. परिणामी विद्यार्थ्यांच्या गुणांवर याचा परिणाम होऊ शकतो. हेही वाचा: जेईई मेन लांबणीवर कोविड १९ च्या गंभीर स्थितीमुळे जेईई मेन परीक्षा दोन वेळा टळली आहे. नव्या वेळापत्रकानुसार जेईई मेन परीक्षा १ ते ६ सप्टेंबर या कालावधीत तर जेईई अॅडव्हान्स्ड परीक्षा २७ सप्टेंबर रोजी होणार आहे.

from Career News in Marathi: Career News, मराठी Career बातम्या | Maharashtra Times https://ift.tt/30CasmT
via IFTTT