जेईई मेन परीक्षा उद्यापासून; 'या' गोष्टी ध्यानात असू द्या...

JEE Main 2020 by NTA: देशभरातील आयआयटींमधील अभियांत्रिकीच्या पदवी अभ्यासक्रमांच्या प्रवेशांसाठी घेण्यात येणारी जॉइंट एन्ट्रन्स टेस्ट अर्थात या राष्ट्रीय परीक्षेला मंगळवार १ सप्टेंबरपासून सुरूवात होत आहे. कोविड - १९ महामारी संसर्ग स्थितीच्या पार्श्वभूमीवर या परीक्षेला कडाडून विरोध होत आहे. मात्र सर्वोच्च न्यायालयाने हिरवा कंदील दाखवल्याने ही परीक्षा नियोजित वेळेत पार पडणार आहे. परीक्षेदरम्यान विद्यार्थ्यांनी कोणकोणत्या गोष्टी ध्यानात ठेवायला हव्यात, याबाबत नॅशनल टेस्टिंग एजन्सीने गाइडलाइन्स जारी केल्या आहेत. मेन २०२०: पुढील गोष्टींकडे लक्ष द्या तुम्हाला आपल्या अॅडमिट कार्डावर दिलेल्या रिपोर्टिंग टाइमवर परीक्षा केंद्रावर पोहोचायचे आहे. गेट क्लोजिंग टाइमनंतर कोणत्याही विद्यार्थ्याला परीक्षा केंद्रात प्रवेश दिला जाणार नाही. अॅडमिट कार्डासह एकूण चार पानांचे निर्देश देण्यात आले आहेत. पहिल्या पानावर विद्यार्थ्यांच्या परीक्षा केंद्राची माहिती आणि कोविड १९ च्या अनुषंगाने सेल्फ डिक्लेरेशन फॉर्म दिलेला आहे. दुसऱ्या पानावर परीक्षार्थींना परीक्षेसंदर्भात आवश्यक निर्देश देण्यात आले आहेत. तिसऱ्या आणि चौथ्या पानावर करोनासंबंधीची अॅडव्हायजरी दिलेली आहे. तुम्हाला हे सर्व चारही पेज डाऊनलोड करून केंद्रावर घेऊन जायचे आहेत. जर तुमचा धर्म, संस्कृतीप्रमाणे कुठला खास पोशाख घालणं अनिवार्य असेल तर उचित तपासणीसाठी दिलेल्या वेळेच्या थोडं आधी पोहोचावं. अॅडमिट कार्ड, आयडी प्रूफ आणि योग्य तपासणीशिवाय कोणत्याही विद्यार्थ्याला परीक्षा केंद्रात प्रवेश दिला जाणार नाही. यंदा करोनामुळे मेटल डिटेक्टरने स्पर्शविरहित तपासणी होईल. मोठ्या सोलचे बूट, चप्पल, मोठ्या बटणांचे कपडे घालण्यास मज्जाव करण्यात आला आहे. सरकारद्वारे जारी ओरिजनल आयडी प्रूफ जवळ बाळगा. कोणत्याही प्रकारची फोटो कॉपी किंवा स्कॅन्ड कॉपी किंवा मोबाइलमधील फोटो वैध मानला जाणार नाही. परीक्षेदरम्यान रफ वर्कसाठी पाच कोरे पेपर दिले जातील. त्यावर तुम्हाला तुमचे नाव आणि रोल नंबर टाकायचा आहे आणि हे पेपर्स ड्रॉप बॉक्समध्ये टाकायचे आहेत. विद्यार्थ्यांना परीक्षा केंद्रावर थ्री-प्लाय मास्क देण्यात येतील. घरून लावून आलेला मास्क हटवून हा मास्क तुम्हाला लावावा लागेल. केंद्रावर दोन जणांमध्ये किमान ६ फूटांचं अंतर ठेवावं लागेल. परीक्षा केंद्रावर केवळ 'या' गोष्टी घेऊन जा एनटीएच्या वेबसाइटवरून डाउनलोड केलेले अॅडमिट कार्ड आणि संपूर्ण भरलेला सेल्फ डिक्लेरेशन फॉर्म घेऊन जाणे अत्यावश्यक आहे. सेल्फ डिक्लेरेशन फॉर्म आपल्या हस्ताक्षरात नीट भरून दिलेल्या जागी छायाचित्र डकवून डाव्या हाताच्या अंगठ्याचा ठसा लावायचा आहे. याव्यतिरिक्त बॉल पॉइंट पेन, अतिरिक्त पासपोर्ट साइज छायाचित्र, व्यक्तिगत सॅनिटायझल आणि पारदर्शक पाण्याची बाटली घेऊन जायची आहे. मदतीसाठी संपर्क - ईमेल आयडी - jeemain@nta.ac.in संपर्क क्रमांक - 0120-6895200

from Career News in Marathi: Career News, मराठी Career बातम्या | Maharashtra Times https://ift.tt/2EzP2jg
via IFTTT