नीट यूजी परीक्षेचे अॅडमिट कार्ड आज जारी होण्याची शक्यता

NEET 2020: नॅशनल एलिजिबिलीटी कम एन्ट्रन्स टेस्ट १३ सप्टेंबर २०२० रोजी होणार आहे. या परीक्षेचे अॅडमिट कार्ड बुधवारी २६ ऑगस्ट रोजी जारी केले जाण्याची शक्यता आहे. दरम्यान, सोमवारपर्यंत ७ लाख ३० हजार विद्यार्थ्यांनी जेईई मेन (JEE Main) चे अॅडमिट कार्ड डाऊनलोड केले होते. जेईई परीक्षा १ ते ६ सप्टेंबर २०२० या कालावधीत होणार आहे. ३२० विद्यार्थ्यांनी त्यांचे परीक्षा केंद्राचे शहर बदलण्याची विनंती केली आहे. एनटीएने मंगळवारी जेईई आणि नीटसंदर्भात एक महत्त्वाचे परिपत्रक जारी केले त्यात एनटीएद्वारे परीक्षेचे कशा पद्धतीने नियोजन केले जाणार आहे याची सविस्तर माहिती देण्यात आली होती. तसेच जिल्हानिहाय परीक्षा केंद्रांच्या संख्येची देखील माहिती देण्यात आली होती. नीट यूजी आणि जेईई मेन या दोन्ही परीक्षांचे आयोजन करण्यासाठी सर्वोच्च न्यायालयाने परवानगी दिली आहे. एनटीएचे संचालक विनीत जोशी म्हणाले, '२५ ऑगस्ट रोजी सायंकाळी ५ वाजेपर्यंत सुमारे ८५ टक्के विद्यार्थ्यांनी जेईई मेन परीक्षेचे अॅडमिट कार्ड डाऊनलोड केले आहेत. यापैकी ३२० विद्यार्थ्यांनी परीक्षा केंद्राचे शहर बदलण्याची विनंती केली आहे. नीट यूजी २०२० चे अॅडमीट कार्डही लवकरच जारी केले जाणार आहेत. ९९ टक्के विद्यार्थ्यांना त्यांच्या पसंतीक्रमाचे पहिले शहरच परीक्षेसाठी केंद्र म्हणून दिले जाईल याची एनटीए हमी देत आहे.' जेईई मेन परीक्षेसाठी एकूण ६६० केंद्रे आहेत. यात आधीच्या तुलनेत ९० केंद्रांची वाढ झाली आहे. जेईई मेनच्या जानेवारी परीक्षेच्या वेळे एका केंद्रावर १,८७१ विद्यार्थी होते. आता ही संख्या १,४४५ पर्यंत कमी करण्यात आली आहे. नीट यूजीसाठी देखील मागील वर्षीच्या तुलनेत परीक्षा केंद्रांवरील विद्यार्थी संख्या ५९७ वरून ४१६ करण्यात आली आहे. नीटसाठी यंदा ३,८४२ परीक्षा केंद्रे आहेत. मागील वर्षी ही संख्या २,५४६ होती. महाराष्ट्रात जेईई मेनसाठी सर्वाधिक १,१०,३१३ विद्यार्थ्यांनी नोंदणी केली आहे.

from Career News in Marathi: Career News, मराठी Career बातम्या | Maharashtra Times https://ift.tt/2EqxeH6
via IFTTT