राष्ट्रीय शिक्षण धोरणांतर्गत सिलॅबस, पुस्तके कधी तयार होणार; NCERT ने सांगितलं

राष्ट्रीय शिक्षण धोरणांतर्गत सिलॅबस आणि पुस्तके कधी तयार होणार याबाबत राष्ट्रीय शिक्षण संशोधन आणि प्रशिक्षण परिषद अर्थात NCERT ने माहिती दिली आहे. एनसीईआरटीचे संचालक हृषिकेश सेनापती म्हणाले की नव्या राष्ट्रीय धोरणाची अंमलबजावणी 'नेशन फर्स्ट - करेक्टर मस्ट' या सूत्राने होईल आणि याच अनुषंगाने पाठ्यक्रमाची रचना आणि पाठ्यपुस्तके तयार करण्याची संपूर्ण प्रक्रिया २०२३-२४ पर्यत पूर्ण करण्यात येईल. अभ्यासक्रमात बदल करणे ही एक दीर्घ प्रक्रिया आहे आणि सर्व मुद्द्यांवर सर्वंकष विचार करून पाठ्यपुस्तकांना अंतिम रुप देण्याासाठी किमान तीन वर्षांचा काळ लागेल. त्यांनी सांगितले, 'राष्ट्रीय शिक्षण धोरणानुसार पाठ्यक्रम आराखडा, सिलॅबस आणि पाठ्यपुस्तके तयार करण्याची संपूर्ण प्रक्रिया २०२३-२४ पर्यंत पूर्ण केली जाईल. एनसीईआरटीने राष्ट्रीय पाठ्यक्रम आराखडा तयार करण्यासाठी मुलभूत काम सुरू केले आहे. एनसीएफ (नॅशनल करिक्युलम फ्रेमवर्क) पाठ्यक्रम, अध्ययन-अध्यापन आणि मूल्यांकनाचे विविध पैलू ध्यानात घेऊन तयार केले जाईल. हा आराखडा राष्ट्रीय शिक्षण धोरणाच्या शिफारशींच्या अनुरुप असेल.' हृषिकेश सेनापती म्हणाले की पहिल्या टप्प्यात अभ्यासक्रमात काय ठेवायचे, काय हटवायचे याची संपूर्ण आखणी केली जाईल. यानंतर विविध विषयांनुसार विविध समिती तयार केल्या जातील. नव्या शिक्षण धोरणानुसार पुस्तकांचे ओझे कमी होणार आणि विद्यार्थ्यांना त्याऐवजी विविध अॅक्टिव्हिटींशी जोडले जाईल. त्यांना कोडिंग, एखादा कौशल्य विकास कोर्स, योगा सारख्या अॅक्टिव्हिटींशी जोडले जाईल. एनसीईआरटी शालेय तसेच उच्च शिक्षणाचा अभ्यासक्रम आराखडा तयार करण्यासाठी राष्ट्रीय शिक्षक प्रशिक्षण परिषद (एनसीटीसी) ला मदत करेल. विद्यार्थ्यांचा सर्वंकष विकास ध्यानात घेऊन सर्वांगीण मूल्यांकनासाठी आराखडा तयार करण्याचे कामही सुरू झाले आहे.

from Career News in Marathi: Career News, मराठी Career बातम्या | Maharashtra Times https://ift.tt/3hq3lVH
via IFTTT