सीबीएसईने फेरपरीक्षेसंदर्भात ७ सप्टेंबरपर्यंत म्हणणे मांडावे: SC

Compartment Exam 2020: केंद्रीय माध्यमिक शिक्षण मंडळ (CBSE) ने सर्वोच्च न्यायालयाला सांगितलं की दहावी आणि बारावीच्या फेरपरीक्षा (कंपार्टमेंट परीक्षा) सप्टेंबर महिन्याच्या अखेरीस प्रस्तावित आहेत. ज्यांना आपले गुण वाढवायचे आहेत, त्यांच्या परीक्षा म्हणजे श्रेणीसुधार परीक्षाही याच वेळी घेण्यात येणार आहेत. सर्वोच्च न्यायालयात या परीक्षा रद्द करण्याची मागणी करणाऱ्या याचिकेवर आज सुनावणी झाली. न्यायालयाने सीबीएसईला ७ सप्टेंबरपर्यंत आपले म्हणणे मांडण्यास सांगितले आहे. या प्रकरणाची पुढील सुनावणी १० सप्टेंबर रोजी होणार आहे. न्या. ए. एम. खानविलकर, न्या. दिनेश माहेश्वरी आणि न्या. संजीव खन्ना यांच्या खंडपीठाने ही सुनावणी घेतली. दहावी आणि बारावीचे मिळून २,३७,८४९ विद्यार्थ्यांना कंपार्टमेंट श्रेणी लागू आहे. 'करोना व्हायरस महामारीच्या प्रादुर्भावाच्या पार्श्वभूमीवर सीबीएसई कंपार्टमेंट परीक्षा रद्द कराव्यात,' अशी मागणी करणारी याचिका विद्यार्थ्यांनी दाखल केली आहे. या याचिकेवर शुक्रवारी सुनावणी झाली. सीबीएसईने सर्वोच्च न्यायालयाला हेही सूचित केले की कंपार्टमेंट परीक्षांच्या तारखांची अधिसूचना शुक्रवारी येण्याची शक्यता आहे. परीक्षेदरम्यान सुरक्षेचे सर्व उपाय अवलंबिले जातील आणि परीक्षेसाठी एक वर्गात ४० ऐवजी केवळ १२ विद्यार्थी बसतील. परीक्षेसाठी १,२७८ केंद्रही वाढवले जातील, असे सीबीएसईने सर्वोच्च न्यायालयाला सांगितले. विद्यार्थ्यांच्या वतीने बाजू मांडणाऱ्या वकीलांनी कोर्टाला सांगितले की जोपर्यंत सीबीएसई परीक्षा आयोजित होतील, तोपर्यंत कॉलेजांची प्रवेश प्रक्रिया संपलेली असेल.

from Career News in Marathi: Career News, मराठी Career बातम्या | Maharashtra Times https://ift.tt/2QVxala
via IFTTT