नीट यूजी काऊन्सेलिंग फेरी लांबणीवर; तांत्रिक घोळाचा फटका

NEET UG Counselling 2020: प्रक्रियेतील ऑल इंडिया कोटासाठी सुरू होणारी नीट यूजी काऊन्सेलिंग फेरी एका दिवसाने पुढे ढकलण्यात आली आहे. मंगळवार २७ ऑक्टोबर पासून ही फेरी सुरू होणार होती, ती आता बुधवार २८ ऑक्टोबर २०२० पासून सुरू होईल. काही तांत्रिक अडचण आल्याने हा निर्णय घेतल्याचे मेडिकल काउन्सेलिंग कमिटीने (MCC) कळवले आहे. सर्व विद्यार्थ्यांनी अद्ययावत माहितीसाठी MCC संकेतस्थळाला भेट द्यावी असं आवाहन मेडिकल काउन्सेलिंग कमिटीने केलं आहे. ज्या विद्यार्थ्यांना देशातील वैद्यकीय महाविद्यालयातील MBBS / BDS अभ्यासक्रमांसाठी प्रवेश घ्यायचे आहेत, त्यांना नोंदणी, शुल्क भरणे आणि पसंतीक्रम नोंदवणे या प्रक्रियेसाठी २ नोव्हेंबरपर्यंतचा कालावधी देण्यात आला आहे. आजपासून ही प्रक्रिया सुरू होणार होती, मात्र ती तांत्रिक अडचणींमुळे सुरू होऊ शकली नाही. ही प्रक्रिया बुधवारपासून सुरू होणार आहे. कशी करायची नोंदणी? - नीट ऑल इंडिया काउन्सेलिंग प्रक्रियेत सहभागी होण्यासाठी mcc.nic.in वर रजिस्टर करावे लागेल. - एमसीसीच्या संकेतस्थळावर जा. - होम पेजवर डावीकडे न्यू रजिस्ट्रेशन लिंक दिसेल. त्यावर क्लिक करा. - यात विचारलेली सर्व माहिती भरून रजिस्टर करा. - रजिस्टर केल्यानंतर तुम्हाला एक आयडी मिळेल. - पुढील सर्व प्रक्रियेसाठी हा आयडी महत्त्वाचा असणार आहे. त्यामुळे तो सुरक्षितपणे नोंदवून ठेवा. ही चूक करू नका नीट यूजी काऊन्सेलिंगसाठी उमेदवाराला एकदाच रजिस्ट्रेशन करता येतं. त्यामुळे एकाहून जास्त वेळा रजिस्ट्रेशनचा प्रयत्न केल्यास तुम्हाला ब्लॉक केलं जाईल, ही गोष्ट ध्यानात ठेवा. निकाल कधी? एनईईटी समुपदेशन 2020 च्या पहिल्या फेरीसाठी नोंदणी, शुल्क भरणे, पसंतीक्रम नोंदवणे यासाठी २८ ऑक्टोबर ते २ नोव्हेंबर २०२० या कालावधीत प्रक्रिया राबवली जाईल. सीट अलॉटमेंटचा निकाल ५ नोव्हेंबर २०२० रोजी जाहीर होईल. समुपदेशनाची दुसरी फेरी १८ ते २२ नोव्हेंबर २०२० दरम्यान आयोजित केली जाईल. मेडिकल काउन्सिल ऑफ इंडियानुसार, यावर्षी देशातील ५२९ शासकीय, बिगर शासकीय आणि खासगी वैद्यकीय महाविद्यालयांमध्ये एमबीबीएससाठी ७५ हजार हून अधिक आणि बीडीएससाठी २६,९४९, आयुषच्या ५२,७२०, एम्सच्या १२०५, जिपमरच्या २०० आणि बीवीएसच्या ५२५ रिक्त जागांसह एकूण १ लाख ५६ हजार ५५९ जागांवर ऑल इंडिया रँक आणि स्टेट रँकनुसार प्रवेश होतील.

from Career News in Marathi: Career News, मराठी Career बातम्या | Maharashtra Times https://ift.tt/3kz0sDw
via IFTTT