नववी ते बारावीचे वर्ग २३ नोव्हेंबरपासून सुरू करण्याचा विचार: शिक्षणमंत्री

School Reopening: राज्यातील शाळांमधील दहावी-बारावीचे वर्ग दिवाळीनंतर प्रत्यक्ष सुरू होण्याचे संकेत शालेय शिक्षणमंत्री यांनी दिले होते. करोना प्रादुर्भावाची स्थिती सध्या थोडीफार नियंत्रणात आली आहे. या पार्श्वभूमीवर दिवाळीनंतर २३ नोव्हेंबर पासून इयत्ता प्रत्यक्ष सुरु करण्याच्या प्रस्तावावर राज्य सरकार विचार करत आहे, अशी माहिती शालेय शिक्षणमंत्री वर्षा गायकवाड यांनी दिली आहे. एका वृत्तवाहिनीशी बोलताना गायकवाड यांनी ही माहिती दिली. विद्यार्थ्यांचे शैक्षणिक नुकसान टाळण्याचा सरकारचा प्रयत्न आहे. दहावी आणि बारावीचे‌ वर्ग २३ नोव्हेंबरपासून सुरु करण्याचा‌ प्रस्ताव आहे, असे वर्षा गायकवाड म्हणाल्या. मात्र याबाबत अद्याप अंतिम निर्णय होणे बाकी असल्याचेही त्यांनी स्पष्ट केले. त्या म्हणाल्या, 'शक्य असल्यास २३ नोव्हेंबरपासून नववी, दहावी, अकरावी आणि बारावीचे वर्ग सुरु करावेत अशी विनंती आम्ही मंत्रिमंडळाला केली आहे. कालच्या बैठकीत सकारात्मक चर्चा झाली. ही मुलं मोठी आहे, त्यामुळे सोशल डिस्टन्स, मास्कचे नियम पाळले जातील. संख्या जास्त असेल तर दोन वेळेला बोलवण्यात येईल किंवा दिवसाआड बोलवता येईल. २५ टक्के अभ्यासक्रम कमी केल्याने तसं दडपण कमी आहे. दहावी आणि बारावी हा आयुष्यातील महत्त्वाचा टप्पा आहे. त्यामुळे येत्या काळात विद्यार्थी आणि पालकांचं दडपण कमी कसं करता येईल यादृष्टीने आम्ही प्रयत्न करत आहोत.' केंद्र सरकारने १५ ऑक्टोबर २०२० पासूनच शाळा प्रत्यक्ष सुरू करण्यासाठी हिरवा कंदिल दाखवलेला आहे. राज्यांनी त्यांच्या स्तरावर याबाबत निर्णय घेण्याचे निर्देशही दिले आहेत. राज्यात अनलॉकच्या एकेका टप्प्यात मॉल, शॉपिंग सेंटर, जीम, नाट्यगृहे, सिनेमागृहे सुरू झाली आहेत. मात्र शाळा-महाविद्यालये आणि कोचिंग क्लासेस अद्यापही बंदच आहेत. सर्व प्रकारचे शिक्षण ऑनलाइन पद्धतीने सुरू आहे. दरम्यान, शाळा प्रत्यक्ष सुरू झाल्या तरी विद्यार्थ्यांना शाळेत पाठवायचे की नाही हे पालकांसाठी ऐच्छिक असावे, असे केंद्र सरकारचे निर्देश आहेत. जे विद्यार्थी शाळेत येणार नाहीत, त्यांच्यासाठी ऑनलाइन शिक्षण सुरु राहणार आहे. त्यामुळे या सर्व पार्श्वभूमीवर राज्याचे मुख्यमंत्री उद्धव ठाकरे काय निर्णय घेतात, याकडे आता विद्यार्थी-पालकांचे लक्ष लागले आहे.

from Career News in Marathi: Career News, मराठी Career बातम्या | Maharashtra Times https://ift.tt/2JCcNsR
via IFTTT