सेलिब्रेशन!! शाळांना आता ५ ऐवजी १४ दिवसांची दिवाळी सुट्टी

Diwali Vacation: दिवाळी सणाला अवघी पाच दिवस सुट्टी देणारा निर्णय अखेर शिक्षण विभागाने मागे घेतला आहे. आता दिवाळीनिमित्त १४ दिवसांची सुट्टी जाहीर केलीय. ५ दिवसांची दिवाळी सुट्टी जाहीर केल्याचा निर्णय गुरुवारी ६ नोव्हेंबर रोजी शिक्षण विभागाने जाहीर केला होता. मात्र आता ७ नोव्हेंबरच्या नव्या आदेशानुसार, शाळांना ७ नोव्हेंबर ते २० नोव्हेंबरपर्यंत दिवाळीची सुट्टी जाहीर करण्यात आली आहे. यापूर्वी १२ ते १६ नोव्हेंबर अशी पाच दिवसांची सुट्टी जाहीर केली होती. नव्या आदेशामुळे लाखो विद्यार्थी आणि शिक्षकांनाही दिलासा मिळणार आहे. करोनाच्या पार्श्वभूमीवर मार्चपासून ऑनलाइन वर्ग सुरू आहेत. त्यामुळे उन्हाळी व गणेशोत्सवाच्या सुट्टीतही ऑनलाइन वर्ग सुरू होते. त्यामुळे दिवाळीमध्ये मोठी सुट्टी मिळेल अशी अपेक्षा व्यक्त करण्यात येत होती. मात्र राज्य सरकारने फक्त १२ ते १६ नोव्हेंबर अशी पाचच दिवस ऑनलाइन वर्गाला सुट्टी जाहीर केली. त्यामुळे शिक्षक आणि विद्यार्थी-पालक नाराज होते. मुंबई शिक्षक परिषद, टीचर्स डेमोक्रॅटिक फ्रंट, शिक्षक भारती, भाजप शिक्षक आघाडी अशा बहुतांश शिक्षक संघटनांनी सरकारच्या अवघ्या पाच दिवसांच्या दिवाळी सुट्टीविरोधात नाराजीचा सूर लावला होता. परिणामी आज शुक्रवारी राज्य सरकारच्या शालेय शिक्षण आणि क्रीडा विभागाने नवा आदेश काढत ७ नोव्हेंबर ते २० नोव्हेंबर अशी १४ दिवसांची दिवाळीची सुट्टी जाहीर केली. शिक्षक भारतीने केली होती जीआरची होळी ५ नोव्हेंबर २०२० आणि २९ ऑक्टोबर २०२० रोजी शालेय शिक्षण विभागाने काढलेल्या निर्णयांची शिक्षक भारतीच्या वतीने आज राज्यभर होळी करण्यात आली. शाळा संहितेनुसार शैक्षणिक वर्षात शिक्षकांना ७६ सुट्ट्या घेण्याचा अधिकार दिलेला आहे. दरवर्षी शिक्षकांना १८ दिवसाची दिवाळीची सुट्टी दिली जाते. करोनाचे कारण पुढे करून आणि बालदिन सप्ताहासाठी शिक्षण विभागाने या वर्षी केवळ पाच दिवसाची सुट्टी जाहीर केली आहे. याचा शिक्षक भारतीने निषेध केला आहे, असं शिक्षक भारतीचे कार्याध्यक्ष सुभाष मोरे यांनी सांगितलं. मार्च महिन्यामध्ये लाॅकडाऊन जाहीर झाल्यापासून शिक्षक-शिक्षकेतर कर्मचारी कोविड ड्युटी करत आहेत. ऑनलाइन शिक्षण देण्याचे काम करत आहेत. मे महिन्यामध्ये लाॅकडाऊनमुळे शिक्षकांना कर्मचाऱ्यांना स्वतःच्या गावी सुद्धा जाता आलेले नाही. १५ जून पासून नियमितपणे ऑनलाईन शिक्षण देण्याचे कार्य सुरू आहे. तसेच विद्यार्थ्यांना तासनतास ऑनलाइन शिक्षणासाठी बसून राहावे लागत आहे. बालकांच्या मानसिक स्थितीचा विचार करून दिवाळीची सुट्टी देणे आवश्यक आहे, अशी शिक्षक भारतीची भूमिका होती.

from Career News in Marathi: Career News, मराठी Career बातम्या | Maharashtra Times https://ift.tt/38gT7VO
via IFTTT