६५ टक्के पालकांनी शुल्क थकवले; ऑनलाइन वर्ग एक दिवस बंद

म. टा. वृत्तसेवा, अंबरनाथ करोनाच्या संकटामुळे यंदाच्या शैक्षणिक वर्षात विद्यार्थ्यांचे वर्ग ऑनलाइन सुरू आहेत. शाळा बंद असल्या तरी शिक्षकांचे वेतन आणि इतर खर्चाचा शाळांवर भार पडत आहे. मात्र यंदाच्या शैक्षणिक वर्षात ६५ टक्क्यांहून अधिक पालकांनी पाल्यांचे उर्वरित शुल्क भरलेले नाही. त्यामुळे फेडरेशन ऑफ स्कुल असोसिएशन ऑफ महाराष्ट्र आणि पुस्मा संस्थेकडून गुरुवारी एक दिवस ऑनलाइन वर्गातील शिक्षण बंद ठेवत पालकांना शुल्क भरण्याचे आवाहन केले. पालकांनी शुल्क न भरल्यास ऑनलाइन वर्ग बंद ठेवण्याचा कालावधी वाढवणार असल्याचाही इशारा पुस्माने दिला आहे. विद्यार्थ्यांच्या सुरक्षेसाठी शाळा अद्याप बंद आहेत. या काळात शैक्षणिक शुल्कावरून पालक आणि शाळांमध्ये अनेक वाद उद्भवले आहेत. बहुतांश खासगी शाळांमध्ये शैक्षणिक वर्ष सुरू होण्याआधीच सप्टेंबर ते डिसेंबर या काळात पुढील शैक्षणिक वर्षांतील शुल्क भरण्याची प्रक्रिया घेतली जाते. त्यामुळे चालू शैक्षणिक वर्षाचे शुल्क पालकांनी कमी-अधिक प्रमाणात गेल्या वर्षीच अदा केले होते. मात्र मार्चपासून बंद असलेल्या शाळा जूनमध्येही सुरू न झाल्याने अनेक पालकांनी शाळांकडे शुल्क परत करण्याची मागणी केली होती. यानंतर ऑनलाइन वर्ग सुरू झाल्याने पालकांनी दोन ते तीन टप्प्यांत पाल्यांचे शुल्क भरणे अपेक्षित होते. मात्र चालू शैक्षणिक वर्षात जवळपास ६५ टक्के पालकांनी ६ महिन्यांनंतरचे शुल्क भरण्याला प्रतिसाद दिला नाही. त्यामुळे प्रत्यक्ष शाळा बंद असल्या तरी ऑनलाइन वर्ग घेणाऱ्या शिक्षकांचे वेतन कसे द्यावे, हा प्रश्न शाळआ व्यवस्थापनास पडला आहे. वारंवार मागणी केल्यानंतरही पालकांकडून शुल्क भरण्याबाबत प्रतिसाद मिळत नसल्याचे दिसत आहे. त्यामुळे फेडरेशन ऑफ स्कुल असोसिएशन ऑफ महाराष्ट्र आणि त्यांच्याशी संलग्न असलेल्या पुस्मा संस्थेने ठाणे, कल्याण, डोंबिवली आणि मुंबई परिसरातील जवळपास दीडशे शाळांचे ऑनलाइन वर्ग गुरुवारी खंडित केले. हा निर्णय एक दिवसापुरता असला तरी पालकांचा प्रतिसाद न मिळाल्यास यात वाढ होईल, असे या संस्थेने म्हटले आहे. हेही वाचा: एकाही विद्यार्थ्याचे शिक्षण थांबवण्याचा शाळांचा विचार नाही. मात्र शुल्क न भरणाऱ्या पालकांनी जबाबदारीने विचार करून शिक्षक व त्यांच्या कुटुंबीयांचाही विचार करावा. पालकांनी शैक्षणिक शुल्कच न भरल्यास शिक्षकांच्या वेतनाचा भार शाळा कसा उचलतील, याचा पालकांनी विचार करण्याची गरज आहे. -भरत मलिक, उपाध्यक्ष, फेडरेशन ऑफ स्कुल असोसिएशन ऑफ महाराष्ट्र हेही वाचा:

from Career News in Marathi: Career News, मराठी Career बातम्या | Maharashtra Times https://ift.tt/34qoN8B
via IFTTT