१ जानेवारीपासून सुरू होणार का शाळा? संभ्रम कायम

म. टा. विशेष प्रतिनिधी, मुंबई राज्य सरकारने नववी ते बारावीच्या प्रत्यक्ष शाळा सुरू करण्यास परवानगी दिली असली तरी मुंबई महापालिकेने ३१ डिसेंबरपर्यंत शाळा सुरू करू नये असे आदेश काढले आहेत. मात्र १ जानेवारीपासून शाळा सुरू करायच्या की नाहीत, याबाबत अद्याप कोणतीही स्पष्टता नाही. यामुळे मुख्याध्यापकांमध्ये संभ्रम आहे. शाळा सुरू करण्याचा निर्णय परिस्थितीचा आढावा घेण्यात येणार असून, पुढील आठवड्यात याबाबत स्पष्टता येईल, असे शिक्षण विभागातील अधिकाऱ्याने सांगितले. मुंबई, ठाणे, पालघर आणि काही अन्य जिल्हे वगळता इतर भागांत २३ नोव्हेंबरपासून नववी ते बारावीच्या शाळा सुरू झाल्या आहेत. आतापर्यंत राज्यभरातील सुमारे १० लाख विद्यार्थी शाळेत दाखल झाले आहेत. मुंबई परिसरात करोनाचा प्रभाव सर्वाधिक असल्याने या भागातील शाळा सुरू झाल्या नव्हत्या. करोनाच्या दुसऱ्या लाटेच्या भीतीमुळे पालकांसह शिक्षकही शाळा सुरू करण्यास तयार नव्हते. मात्र करोनाच्या नव्या रुग्णांमध्ये घट होत असल्याने शाळा सुरू करण्यास तयारी दर्शविण्यात येत आहे. ऑनलाइन शिक्षण घेण्यात विद्यार्थ्यांना अडचणी येत असल्याने शाळेत विद्यार्थांची उपस्थिती वाढली आहे. याच पार्श्वभूमीवर मुंबई आणि परिसरातील शाळा सुरू करण्यासाठी पालक, शिक्षक आग्रही झाले आहेत. दहावी, बारावीच्या विद्यार्थ्यांचे महत्त्वाचे वर्ष असल्याने त्यांना प्रत्यक्ष शाळेत शिक्षण देणे आवश्यक आहे. विद्यार्थी घरी राहून कंटाळले आहेत. करोनारुग्ण कमी झाल्याने शाळा सुरू करण्याविषयी महापालिकेच्या शिक्षण विभागासह शाळा, प्राध्यापक आणि पालकांनीही सकारात्मकता दर्शविली आहे. त्यानुसार नवीन वर्षात १ जानेवारीपासून मुंबईसह ठाणे, रायगड जिल्ह्यात नववी ते बारावीपर्यंतच्या शाळा सुरू होण्याची शक्यता वर्तविण्यात येत आहे. मात्र याबाबत अद्याप प्रशासनाने कोणतेही आदेश दिलेले नाहीत. यामुळे प्रशासाने याबाबत लवकरात लवकर स्पष्टता आणावी, अशी मागणी मुख्याध्यापक व पालकांकडून होत आहे. शाळा सुरू करण्याबाबत शिक्षण विभागात चर्चा सुरू आहे. परंतु परिस्थिती पाहून याबाबत निर्णय घेतला जाईल, असे महापालिकेच्या अधिकाऱ्याने सांगितले. पुढील आठवड्यात शाळा सुरू होणार की नाही याविषयी स्पष्टता येणार येईल, असेही या अधिकाऱ्याने सांगितले.

from Career News in Marathi: Career News, मराठी Career बातम्या | Maharashtra Times https://ift.tt/2WLdSln
via IFTTT