विद्यार्थ्यांची यंदा 'फार्मसी'ला पसंती; जागांच्या संख्येतही वाढ

Career In Pharmacy: करोनाकाळात नवसंजीवनी मिळालेल्या औषधनिर्माणशास्त्र अर्थात फार्मसीला जाण्याऱ्या विद्यार्थ्यांचा ओढा वाढत आहे. या क्षेत्रात होत असलेली गुंतवणूक (Investment in ) आणि निर्माण होणाऱ्या संधी () लक्षात घेता विद्यार्थ्यांनी यंदा या अभ्यासक्रमाला पसंती दिल्याचे तज्ज्ञांचे म्हणणे आहे. यंदा २६ हजार ५४५ जागांसाठी मंगळवारी सकाळी प्राप्त झालेल्या माहितीनुसार ६२ हजार १०४ विद्यार्थ्यांनी अर्जनिश्चिती केली आहे. मागील काही वर्षांपासून अभ्यासक्रमांना विद्यार्थ्यांचा ओढा वाढताना दिसत आहे. असे असले, तरी दर वर्षी पदवीच्या काही जागा रिक्त राहायच्या. २०१९-२० या शैक्षणिक वर्षात बीफार्मच्या पाच हजार ४८८ जागा रिक्त राहिल्या होत्या. यंदा या जागा रिक्त न राहता उलट हजारो विद्यार्थी प्रवेशाविना राहतील, असा अंदाज व्यक्त करण्यात येत आहे. करोनाकाळात औषधनिर्माणशास्त्रात वाढलेल्या संधी आणि या क्षेत्रात होणारी गुंतवणूक याचा हा परिणाम असल्याचे तज्ज्ञांचे मत आहे. या वर्षी राज्यात २७ नव्या संस्थांमध्ये हा पदवी अभ्यासक्रम सुरू करण्यात आला आहे. तर, काही संस्थांमध्ये जागाही वाढवून देण्यात आल्या आहेत. यामुळे या वर्षी या अभ्यासक्रमासाठी राज्यात सुमारे ३१९ संस्थांमध्ये २६ हजार ५४५ जागा उपलब्ध आहेत. जागांची संख्या यंदा चार हजार ४५ने वाढली आहे. यंदा नवीन अखिल भारतीय तंत्रशिक्षण परिषदेकडून मान्यता देण्यात आलेल्या कॉलेजांमध्येही फार्मसी कॉलेजांची संख्या जास्त असल्याचे दिसून आले आहे. मागील वर्षी राज्यात २४ हजार ४८६ जागांसाठी १८ हजार ९९८ विद्यार्थ्यांनी प्रवेश घेतले. त्या वेळी अर्जसंख्या ही यंदाच्या अर्जसंख्येपेक्षा कमी होती, असे प्रवेश प्रक्रियेतील सूत्रांकडून समजले. करोनाकाळात फार्मसी क्षेत्रात मोठ्या प्रमाणावर संधी निर्माण झाल्या आहेत. या कालावधीत केंद्र सरकारच्या विविध विभागांतर्फे कोट्यवधी रुपयांची गुंतवणूक करण्यात आली आहे. याची माहिती विद्यार्थ्यांपर्यंत पोहचत असल्याने ही अर्ज संख्या वाढल्याचे दिसत असल्याचे मुंबई विद्यापीठाच्या विज्ञान तंत्रज्ञान विभागाच्या अधिष्ठाता डॉ. अनुराधा मजुमदार यांनी सांगितले. या क्षेत्रात सध्या मोठ्या प्रमाणावर संधी निर्माण झाल्या आहेत. फामर्सी करून विद्यार्थी ड्रग डिलिव्हरी सिस्टीम, नॅनो टेक्नॉलॉजी, कॅन्सर ड्रग्ज अशा विविध क्षेत्रात संशोधनासाठी जातात. याचबरोबर डेटा सायन्स, क्लिनिकल रायटिंग अशा विविध क्षेत्रात मोठ्या संधी आहेतच; शिवाय परदेशात 'फार्मसी इकोनॉमिक्स' या क्षेत्रातील संधीही खूप मोठ्या आहेत. यामुळे सध्या या क्षेत्रात सुरुवातीला देण्यात येणारे वेतनही चांगले दिले जाते. तसेच, पुढील दोन वर्षांत उत्तम काम करणाऱ्याला उत्तम संधीही मिळते. यामुळे विद्यार्थ्यांचा कल या क्षेत्राकडे वाढत अल्याचे निरक्षणही डॉ. मजुमदार यांनी नोंदविले. संख्या वाढण्याची शक्यता विद्यार्थ्यांना अर्ज निश्चित करण्यासाठी ३१ डिसेंबरपर्यंतची मुदत आहे. मंगळवारी संध्याकाळी ६.५० वाजता प्राप्त झालेल्या आकडेवारीनुसार फर्मसीच्या पदवी आणि पदविका अशा दोन्ही अभ्यासक्रमांसाठी मिळून ८५ हजार ७३६ विद्यार्थ्यांनी नोंदणी केली आहे. यापैकी आणखी काही विद्यार्थी अर्जनिश्चिती करू शकतील. यामुळे यंदा फार्मसी प्रवेशात चांगलीच चुरस पाहवयास मिळणार आहे. फार्मसीच्या विभागनिहाय जागा विभाग -- एकूण जागा -- अर्ज संख्या अमरावती -- २२२६ -- ७२२३ औरंगाबाद -- ५४८१ -- १०८३६ मुंबई -- ३१६१ -- ७४७८ नागपूर --१९८५ -- ४९६४ नाशिक -- ६१९५ -- १४९५४ पुणे -- ७४९ -- १४२५० एकूण -- २६५४५ -- ५९७०५ (तक्त्यातील आकडेवारी शुक्रवार संध्याकाळपर्यंतची आहे.)

from Career News in Marathi: Career News, मराठी Career बातम्या | Maharashtra Times https://ift.tt/3o4rapi
via IFTTT