वैद्यकीय पदव्युत्तर अभ्यासक्रमाच्या परीक्षा पुढे ढकलण्याची मागणी

म. टा. प्रतिनिधी, पुणे राज्यातील 'एमडी', 'एमएस'सारख्या वैद्यकीय पदव्युत्तर अभ्यासक्रमाच्या अंतिम वर्षाच्या परीक्षा पुढे ढकलण्यात याव्यात; तसेच यासाठीच्या सबमिशनसाठी अधिक वेळ दिला जावा, अशी मागणी विद्यार्थ्यांनी महाराष्ट्र आरोग्य विज्ञान विद्यापीठाकडे केली आहे. 'एमडी' किंवा 'एमएस' अभ्यासक्रमाच्या विद्यार्थ्यांना ३१ मार्चअखेर प्रबंध (थिसिस) सादर करायचा आहे. त्याचबरोबर या संदर्भात २० डिसेंबर २०२० रोजी प्रसिद्ध केलेल्या परिपत्रकानुसार विद्यार्थ्यांना त्यांच्या थिअरी व क्लिनिकल परीक्षांच्या किमान तीन महिने आधी हा प्रबंध सादर करायचा आहे. त्यानुसार या परीक्षा जुलै किंवा ऑगस्टमध्ये होण्याची शक्यता आहे. या पार्श्वभूमीवर विद्यार्थ्यांनी ही मागणी केली. 'अनेक हॉस्पिटल ही कोव्हिड केंद्रे म्हणून अद्यापही कार्यरत आहेत. परीक्षेच्या तयारीसाठी नियमाप्रमाणे ९० दिवसांची सुटी (प्रिपरेटरी लिव्ह) मिळत नाही. यंदा अभ्यासक्रमही शिकवून झालेला नाही. २०१७च्या तुकडीच्या अंतिम वर्षाच्या (थिअरी) परीक्षा ऑगस्ट २०२०मध्ये घेण्यात आल्या, तर प्रात्यक्षिक परीक्षा सप्टेंबर २०२०मध्ये घेण्यात आल्या. सध्या करोना ड्युटी असल्याने अभ्यास पूर्ण करणे अवघड झाले आहे,' असे विद्यार्थ्यांच्या निवेदनात म्हटले आहे. पूर्वी दिलेल्या माहितीनुसार ३१ मार्चअखेर 'डिसर्टेशन' सादर करायचे होते. परंतु, आता २५ फेब्रुवारीअखेर 'डिसर्टेशन' सादर करण्याची नोटीस विद्यापीठाने काढली आहे. इतक्या कमी कालावधीत 'डिसर्टेशन' सादर करणे शक्य नसल्याने त्यासाठी पूर्वीप्रमाणेच मार्चअखेरची मुदत द्यावी, अशी विद्यार्थ्यांची मागणी आहे. 'पुरेसा अनुभव मिळू दे' ''मास्टर ऑफ सर्जरी'च्या (एमएस) विद्यार्थ्यांना पुरेसा प्रात्यक्षिक अनुभव मिळावा, शस्त्रक्रियांचे कौशल्य आत्मसात करता यावे यासाठी, तसेच एमडी अभ्यासक्रमाच्या विद्यार्थ्यांना अधिकाधिक रुग्णांना तपासण्याचा अनुभव घेता यावा, यासाठी या अभ्यासक्रमाच्या अंतिम परीक्षा ऑगस्ट अथवा जुलैमध्ये घेण्यात याव्यात,' असे या विद्यार्थ्यांच्या म्हणणे आहे.

from Career News in Marathi: Career News, मराठी Career बातम्या | Maharashtra Times https://ift.tt/3d3wqa6
via IFTTT