लष्करभरती होणार अधिक पारदर्शक

म. टा. प्रतिनिधी, पुणे पूर्णत: भ्रष्टाचारमुक्त व पारदर्शी पद्धतीने व्हावी, यासाठी लष्कर कटिबद्ध आहे. नुकत्याच उघडकीस आलेल्या लष्करभरती (सैनिक-सर्वसाधारण ड्युटी) पेपरफुटी प्रकरणाची लष्कर व पोलिस संयुक्तरीत्या चौकशी करत आहेत. या चौकशीतून समोर येणाऱ्या त्रुटींची नोंद घेऊन लष्करभरतीची प्रक्रिया अधिक बळकट करण्यात येईल, असे लष्करातर्फे स्पष्ट करण्यात आले आहे. २८ फेब्रुवारी २०२१ रोजी पुण्यासह देशातील ४० ठिकाणी लष्करी जवान (सर्वसाधारण ड्युटी) या पदासाठीची परीक्षा होणार होती. या परीक्षेची प्रश्नपत्रिका फुटल्याची माहिती लष्करी गुप्तचर विभागाला मिळाली होती. या माहितीवरून पुणे पोलिसांनी केलेल्या कारवाईत पहिल्यांदा तिघांना ताब्यात घेण्यात आले. त्यांच्याकडे आढळलेली प्रश्नपत्रिका मूळ प्रश्नपत्रिकेशी १०० टक्के जुळत असल्याने ही परीक्षाच रद्द करण्यात आली. यानंतर आणखी चार व्यक्तींना म्हणजेच एकूण सात जणांना अटक करण्यात आली. यामध्ये काही लष्करी कर्मचाऱ्यांचाही समावेश आहे. या पार्श्वभूमीवर लष्करभरती प्रक्रिया अधिक मजबूत व पारदर्शक करण्यात येईल; तसेच पुण्यातील पेपरफुटीसंदर्भात लष्करभरतीतील मार्गदर्शक तत्त्वांचा भंग केलेल्या व्यक्तींविरोधात योग्य ती कायदेशीर कारवाई केली जाईल, असे लष्करातर्फे प्रसिद्धीस देण्यात आलेल्या पत्रकात म्हटले आहे.

from Career News in Marathi: Career News, मराठी Career बातम्या | Maharashtra Times https://ift.tt/30fQMFm
via IFTTT