‘प्री-आयएएस’ प्रवेशाची परीक्षा ऑनलाइन

म. टा. प्रतिनिधी, औरंगाबाद उच्च शिक्षण विभागाच्या भारतीय प्रशासकीय सेवापूर्व प्रशिक्षण केंद्रातील (प्री-आयएएस ट्रेनिंग सेंटर) सामायिक प्रवेश प्रक्रिया परीक्षा ऑनलाइन घेतली जाणार आहे. २० मार्च रोजी ही परीक्षा घेतली जाणार आहे. करोनाचा परिणाम विविध प्रवेश प्रक्रियांवर झाला. उच्च शिक्षण विभागातर्फे प्रीआयएएस ट्रेनिंग सेंटर प्रवेश प्रक्रियचे वेळापत्रक जाहीर करण्यात आले. यूपीएससी-नागरी सेवा परीक्षा २०२१च्या पूर्व तयारीसाठी परीक्षापूर्व प्रशिक्षणासाठी ऑनलाइन अर्ज भरण्याची प्रक्रिया संपली असून, परीक्षा २० मार्च रोजी घेतली जाणार आहे. राज्यात औरंगाबादसह मुंबई, नागपूर, कोल्हापूर, नाशिक व अमरावती या ठिकाणी हे प्रशिक्षण केंद्र आहेत. पदवी, पदवीच्या अंतिम वर्षाला प्रवेशित विद्यार्थ्यांना परीक्षा देता येते. केंद्रात पात्र ठरलेल्या विद्यार्थ्यांना शिष्यवृत्तीही दिली जाते. प्रवेश परीक्षेला विद्यार्थ्यांची नोंदणी करण्याबाबत त्यासह परीक्षेचे वेळापत्रक कॉलेजांनाही पाठविण्यात आले होते. मॉक टेस्ट १३ मार्चला ऑनलाइन परीक्षेपूर्वी ऑनलाइन अभिरुप चाचणी परीक्षा १३ मार्च रोजी सकाळी १० वाजता होणार आहे. ऑनलाइन परीक्षेचे दोनशे गुण व मुलाखतीचे पन्नास गुण मिळवून मिळणाऱ्या गुणांच्या आधारे प्रवेश दिला जाणार आहे. विषयात सामान्य अध्ययन-१, सामान्य अध्ययन-२ असे पेपर आहेत. लेखी परीक्षेच्या निकालानंतर मुलाखतीची तारीख, वेळ कळविण्यात येणार आहे. लेखी परीक्षेचा निकाल २८ मार्च रोजी जाहीर करण्यात येणार आहे. प्रक्रियेबाबतची अधिक माहिती www.siac.org.in वेबसाईट उपलब्ध करून देण्यात आली आहे. औरंगाबादची प्रवेश संख्या ८० एवढी असून राज्यातील सहा ही प्रशिक्षण केंद्रात ५४० प्रवेशित संख्या आहे.

from Career News in Marathi: Career News, मराठी Career बातम्या | Maharashtra Times https://ift.tt/3qqhR3w
via IFTTT