राज्याच्या अर्थसंकल्पात शालेय शिक्षणासाठी २४६१ कोटी

म. टा. विशेष प्रतिनिधी, मुंबई राज्याच्या अर्थसंकल्पात २०२१-२२ या आर्थिक वर्षासाठी शालेय शिक्षण विभागासाठी २४६१ कोटी रुपयांची तर उच्च व तंत्र शिक्षण विभागासाठी १३९१ कोटी रुपयांची तरतूद करण्यात आली आहे. जागतिक बँकेच्या सहकार्याने बारावीपर्यंतच्या दर्जेदार शिक्षणासाठी मूलभूत बदल व्हावेत म्हणून स्टार्स योजना राबविण्यात येणार असून यासाठी ९७६ कोटी रुपयांचा खर्च अंदाजित आहे. तसेच शासकीय व जिल्हा परिषद शाळांच्या इमारतींची पुनर्बांधणी व दुरुस्तीसाठी ३००० कोटी रुपयांचा आराखडा तयार करण्यात आल्याची माहिती अर्थमंत्र्यांनी दिली. सातारा येथील सैनिकी शाळेला येत्या तीन वर्षांत ३०० कोटी रुपये निधी देण्यात येणार असून यंदा त्यातील १०० कोटी रुपये निधी देण्यात येणार आहे. पुणे येथे आंतरराष्ट्रीय क्रीडा विद्यापीठाची घोषणा मागील अर्थसंकल्पात करण्यात आली होती. यंदा २०० विद्यार्थ्यांना क्रीडा विज्ञान, क्रीडा शिक्षण व प्रशिक्षण आदी अभ्यासक्रमांसाठी प्रवेश देण्यात येणार आहे. प्रत्येक महसुली मुख्यालयाच्या जिल्ह्यात राजीव गांधी विज्ञान व तंत्रज्ञान पार्क स्थापन करण्यात येणार असून त्यासाठी ३०० कोटी रुपयांचा खर्च होणार असल्याचा अंदाज अर्थमंत्र्यांनी व्यक्त केला. नेहरू तारांगणाच्या नूतनीकरणासाठी १० कोटी रुपये, अमरावती येथील विदर्भ ज्ञान विज्ञान संस्थेच्या शतकपूर्तीनिमित्त १० कोटी तसेच मुलुंड येथील कुणबी समाजोन्नती संघाच्या विद्यार्थी वसतिगृहासाठी पाच कोटी रुपये निधी देण्यात आला आहे.

from Career News in Marathi: Career News, मराठी Career बातम्या | Maharashtra Times https://ift.tt/3t2Ylvo
via IFTTT