सावित्रीबाई फुले पुणे विद्यापीठा शिष्यवृत्तीमध्ये कपात

म. टा. प्रतिनिधी, पुणे सावित्रीबाई फुले पुणे विद्यापीठाने दोन महत्त्वाच्या शिष्यवृत्तींच्या रकमेत आणि लाभार्थी विद्यार्थ्यांच्या संख्येत ५० टक्क्यांची कपात केल्याने, विद्यार्थ्यांनी तीव्र संताप व्यक्त केला आहे. विद्यापीठाने गेल्या वर्षीप्रमाणेच शिष्यवृत्तीचे नियम व अटी केल्या नाहीत, तर तीव्र आंदोलनाचा इशारा विद्यार्थ्यांनी दिला. मात्र, शिष्यवृत्तीच्या रकमेत कोणतीही कपात केली नसून, ती अधिकाधिक विद्यार्थ्यांना कशी मिळेल, याची काळजी घेण्यात आल्याचा दावा विद्यापीठाने केला. सावित्रीबाई फुले पुणे विद्यापीठाकडून कला, वाणिज्य, विज्ञान शाखेच्या पदवी व पदव्युत्तर अभ्यासक्रमांच्या गरजू आणि गुणवंत विद्यार्थ्यांना विविध प्रकारच्या शिष्यवृत्ती योजनांद्वारे मदत केली जाते. विद्यापीठाच्या छत्रपती शाहू महाराज गुणवत्ता शिष्यवृत्ती योजनेअंतर्गत गेल्या वर्षीच्या शैक्षणिक वर्षात अव्यावसायिक पदवी अभ्यासक्रमास प्रवेश घेतलेल्या १२०० विद्यार्थ्यांना प्रत्येकी १२ हजार रुपये, तर पदव्युत्तर अभ्यासक्रमांच्या एकूण ८०० विद्यार्थ्यांना प्रत्येकी १८ हजार रुपये शिष्यवृत्ती देण्यात येत होती. मात्र, यंदाच्या २०२०-२१ या शैक्षणिक वर्षासाठी शिष्यवृत्तीची रक्कम पदवीसाठी सहा हजार रुपये केली असून, एकूण ४७० विद्यार्थ्यांना ही शिष्यवृत्ती देण्यात येणार आहे. त्याच वेळी पदव्युत्तर अभ्यासक्रमांच्या ३०० विद्यार्थ्यांना ही रक्कम आठ हजार रुपये देण्यात येईल, असे परिपत्रकात लिहिले आहे. त्याचप्रमाणे केंद्र सरकारच्या शिष्यवृत्तीचा लाभ घेणाऱ्या विद्यार्थ्यांना या शिष्यवृत्तीचा लाभ घेता येणार नाही. गेल्या वर्षी ही अट नव्हती. त्यामुळे ही अट विद्यापीठाने रद्द करावी, अशी मागणी विद्यार्थ्यांनी केली आहे. अशाच पद्धतीने महात्मा ज्योतिराव फुले गुणवत्ता शिष्यवृत्तीमध्ये रक्कम; तसेच विद्यार्थी संख्येत कपात करण्यात आल्याचे विद्यार्थ्यांनी सांगितले. विद्यापीठाने हे परिपत्रक मागे घेऊन, दोन्ही शिष्यवृत्ती योजनांत लाभार्थी विद्यार्थ्यांच्या संख्येत वाढ करावी; तसेच शिष्यवृत्ती रकमेत वाढ करावी. अन्यथा विद्यार्थ्यांच्या रोषाला सामोरे जाण्यासाठी तयार राहावे, असा इशारा विद्यार्थ्यांनी दिला. सामान्य वर्गातील विद्यार्थ्यांना शिक्षणासापासून वंचित ठेवण्याचा हा मोठा डाव तर नाही ना, अशी शंका विद्यार्थी घेत असल्याचे युवक क्रांती दलाचे कमलाकर शेटे म्हणाले. 'शिष्यवृत्तीची व्याप्ती वाढवली' 'सावित्रीबाई पुणे विद्यापीठाचे एकूण पाच शिष्यवृत्तींसाठी सव्वाआठ कोटी रुपयांचे बजेट असून, राज्यात ते सर्वाधिक आहे. हे बजेट जैसे-थे असून, त्यामध्ये कोणतीही कपात नाही. कोणीतरी जाणीवपूर्वक कपातीबाबत उलट-सुलट चर्चा घडवून आणत आहे. याउलट यंदापासून स्वामी विवेकानंद आर्थिक सहाय्य योजना सुरू करण्यात आली आहे. त्याचा लाभ ३२ हजार विद्यार्थ्यांना मिळणार आहे. विद्यापीठाच्या यापूर्वी चार शिष्यवृत्ती योजनांतून आठ हजार विद्यार्थ्यांना मदत व्हायची. विद्यापीठाच्या समितीच्या सदस्यांद्वारे शिष्यवृत्तीचे सुसूत्रीकरण करण्यात आले असून, पाचवी स्वामी विवेकानंद आर्थिक सहाय्य योजना सुरू केली आहे. त्यामुळे यंदापासून साधारण ४० हजार विद्यार्थ्यांना फायदा होईल. या सर्वांची माहिती वेबसाइटवर उपलब्ध आहे,' असे प्र-कुलगुरू डॉ. एन. एस. उमराणी यांनी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/3qKLDjj
via IFTTT