घोकंपट्टी नव्हे व्यवहार्य ज्ञान; CBSE बोर्डाचा नवा मूल्यांकन आराखडा

CBSE Assessment Framework: केंद्रीय माध्यमिक शिक्षा बोर्ड (CBSE) यांनी इयत्ता सहावी ते दहावीसाठी नवे असेसमेंट फ्रेमवर्क (मूल्यांकन आराखडा) तयार केले आहे. केंद्रीय शिक्षणमंत्री डॉ. रमेश पोखरियाल निशंक ( Nishank) यांनी बुधवारी, २४ मार्च २०२१ रोजी सायंकाळी ५.२० वाजता हा आराखडा जाहीर केला. सीबीएसई बोर्डाने ब्रिटिश काउंसिलच्या सहकार्याने या असेसमेंट फ्रेमवर्कचा आराखडा तयार केला आहे. इयत्ता सहावी ते दहावीसाठी विशेषत: विज्ञान, गणित आणि इंग्रजी या तीन प्रमुख विषयांसाठी सीबीएसई असेसमेंट फ्रेमवर्क लॉन्च करण्यात आलं आहे. हे कॉम्पिटन्सी आधारित आहे. राष्ट्रीय शिक्षण धोरणांतर्गत (NEP) हा आराखडा तयार करण्यात आला आहे. विद्यार्थ्यांनी घोकंपट्टी करू नये, त्यांना व्यवहार्य ज्ञान मिळावं आणि समस्या सोडवण्याची क्षमता त्यांच्यात विकसित व्हावी या दृष्टीने सीबीएसई मूल्यांकनाची पद्धत बदलण्यात आली आहे. कॉम्पिटन्सी आधारित म्हणजे नेमकं कसं असेल मूल्यांकन? या लॉन्च कार्यक्रमात सीबीएसई बोर्डाच्या माजी अध्यक्ष आणि सध्याच्या शालेय शिक्षण संचालक अनिता करवल (Anita Karwal) या देखील उपस्थित होत्या. त्यांनी सांगितले की सध्या शालेय शिक्षण पाठ्यपुस्तकाला केंद्रीभूत ठेवून सुरू आहे. बाहेरचं जग हे पुस्तकी शिक्षणापेक्षा वेगळं असतं. कॉम्पिटन्सी बेस्ड अप्रोच आपण विद्यार्थ्यांना खऱ्या जगाशी सुसंगत ज्ञान देत आहोत. यामुळे त्यांची प्रॉब्लेम सॉल्विंग आणि एनालिटिकल एबिलिटी वाढते. या असेसमेंट फ्रेमवर्क मध्ये विज्ञान, गणित आणि इंग्रजीच्या शिक्षकांना मार्गदर्शन करण्यासाठी सहकार्य उपलब्ध करण्यात येईल. जेणेकरून ते विद्यार्थ्यांना व्यावहारिक शिक्षणाकडे घेऊन जातील. त्यांना दैनंदिन जीवनातील समस्या आणि उदाहरणे घेऊन विषय शिकवतील. त्यामुळे विद्यार्थी केवळ परीक्षा देण्यासाठी शिकणार नाहीत तर त्यांना त्यांच्या जीवनातील, समाजातील, देशातील व्यावहारिक समस्यांचे निराकरण करण्याची क्षमता शिक्षणामुळे त्यांची अंगी येईल.

from Career News in Marathi: Career News, मराठी Career बातम्या | Maharashtra Times https://ift.tt/3sey6lM
via IFTTT