वैद्यकीय महाविद्यालयांना सेवा विस्तारण्याचे निर्देश

म. टा. प्रतिनिधी, मुंबई करोनाचा वाढता प्रादुर्भाव पाहता रुग्णांना सेवा देण्यासाठी आणि रुग्णालयांनी त्यांच्या सेवांचा विस्तार करण्याची आवश्यकता आहे. रुग्णखाटा, ऑक्सिजन, व्हेंटिलेटर या साधनसामग्रीची संख्या वाढविण्यासाठी जे निर्णय घ्यावे लागतील, त्यासाठी शासनस्तरावरून सर्व आवश्यक ते सहकार्य करण्यात येईल, अशी ग्वाही वैद्यकीय शिक्षणमंत्री अमित देशमुख यांनी सोमवारी दिली. देशमुख यांनी मंत्रालयातून दूरदृश्य प्रणालीद्वारे राज्यातील करोनाचा प्रादुर्भाव आणि उपाययोजनांचा आढावा घेतला. वैद्यकीय शिक्षण सचिव सौरभ विजय, वैद्यकीय शिक्षण संचालक डॉ. तात्याराव लहाने यांच्यासह सर्व विभागीय आयुक्त, जिल्हाधिकारी, महापालिका आयुक्त, नगरपालिका मुख्याधिकारी, जिल्हा शल्यचिकित्सक, जिल्हा आरोग्य अधिकारी, सर्व शासकीय वैद्यकीय आणि आयुर्वेद महाविद्यालयांचे अधिष्ठाता या बैठकीला उपस्थित होते. करोनाची दुसरी लाट पाहता वैद्यकीय महाविद्यालयांनी कोविड केअर सेंटर्स सुरू करण्याची आवश्यकता आहे. रुग्ण व्यवस्थापन करणे आवश्यक असून, त्यासाठी प्रयत्न व्हावेत. सौम्य आणि कमी लक्षणे असतील अशा रुग्णांवर उपचारासाठी मार्गदर्शक सूचनांचे पालन करण्याच्या सूचना वैद्यकीय शिक्षणमंत्र्यांनी यावेळी दिल्या. सध्या ऑक्सिजनचे १०० टक्के उत्पादन हे केवळ वैद्यकीय कारणासाठीच आरक्षित आहे. सर्व जिल्ह्यांना ऑक्सिजनचा पुरवठा सुरळीत होण्यासाठी वाहतुकीचे योग्य नियोजन करावे. व्हेंटिलेटरची वाढती मागणी लक्षात घेता केंद्राकडे पाठपुरावा करावा, असे ते म्हणाले. रुग्णालयात २४ तासाच्या आत मृत पावणाऱ्या रुग्णांची संख्या कमी करण्यासाठी विहित केलेल्या आदर्श कार्यपद्धतीचे पालन करण्याची आवश्यकता आहे. संसर्ग झाल्यानंतर रुग्ण उशिराने आठ दिवसानंतर रुग्णालयात दाखल झाला तर नंतर तो दगावतो, त्यासाठी अगोदरच चाचणी करण्याची आवश्यकता आहे. त्यासाठी ट्रेसिंगवर लक्ष देण्याच्या सूचनाही वैद्यकीय शिक्षणमंत्र्यांनी दिल्या आहेत. ज्या संस्था शासनाची मानके पूर्ण करीत असतील त्यांना लसीकरणाच्या मोहिमेत सहभागी करून घ्यावे. वैद्यकीय शिक्षण संस्था, प्राध्यापक, विद्यार्थी, डॉक्टर्स हे सर्व हेल्थ वर्कर्स असून, या सर्वांनी करोनाविरुद्धच्या लढ्यात सहभागी होण्याचे आवाहन देशमुख यांनी यावेळी केले. ज्या जिल्ह्यांमध्ये तंत्रज्ञ, एमबीबीएस डॉक्टर्स किंवा इतर मनुष्यबळ बाह्यस्त्रोतांद्वारे भरण्याची मागणी होत आहे, त्या सर्व जिल्ह्यांना शासनस्तरावरून स्वयंस्पष्ट सूचना द्या, काही अडचणी उद्भवल्यास अधिष्ठात्यांनी जिल्हाधिकाऱ्यांशी चर्चा करून कार्यवाही करण्याच्या सूचनाही वैद्यकीय शिक्षणमंत्री देशमुख यांनी यावेळी दिल्या.

from Career News in Marathi: Career News, मराठी Career बातम्या | Maharashtra Times https://ift.tt/2Qol9Yr
via IFTTT