परफॉर्मिंग आर्ट्सच्या परीक्षा कशा घ्यायच्या? पुणे विद्यापीठापुढे आव्हान

म. टा. प्रतिनिधी, पुणे सावित्रीबाई फुले पुणे विद्यापीठाशी संलग्न असलेल्या महाविद्यालयांमधील विद्यार्थ्यांच्या ऑनलाइन परीक्षांना सुरुवात झाली आहे. या परीक्षा ऑनलाइन घेणे शक्य असले तरी नृत्य, नाट्य, संगीत, कला अशा परफॉर्मिंग आर्ट‌्सच्या परीक्षा कशा घ्यायच्या, असे आव्हान विद्यापीठासमोर उभे ठाकले आहे. विद्यार्थ्यांचे वर्ष वाया जाऊ नये यासाठी विद्यापीठाकडून या संदर्भात चाचपणी सुरू करण्यात आली असून, लवकरच परीक्षेसंदर्भात मार्ग काढणार असल्याचे विद्यापीठाच्या ललित कला केंद्राकडून स्पष्ट करण्यात आले आहे. ललित कला केंद्रामध्ये नृत्य, नाट्य, संगीत अशा विषयांमध्ये पदवी आणि पदव्युत्तर अभ्यासक्रम शिकणारे विद्यार्थी आहेत. याशिवाय शेकडो विद्यार्थी शहरातील इतर अभिमत विद्यापीठांमध्ये परफॉर्मिंग आर्ट‌्सचे प्रशिक्षण घेतात. बहुतांश महाविद्यालयांमध्ये हे शिक्षण गुरुकुल पद्धतीने चालवले जाते. कला शिकणाऱ्या प्रत्येक विद्यार्थ्यांला त्याचे शिक्षक वैयक्तिक मार्गदर्शन करतात. या विद्यार्थ्यांच्या परीक्षेमध्ये सर्वाधिक भर सादरीकरणावर असतो. सध्याचा काळ पाहता विद्यार्थ्यांना ऑनलाइन सादरीकरण करणे अत्यंत अवघड आहे. त्यातून गुणांकन करणे अवघड ठरणार आहे. त्यामुळे विद्यार्थ्यांना प्रत्यक्ष सादरीकरणाशिवाय पर्याय उरणार नाही. यामुळे परीक्षा कशा पद्धतीने घ्यायच्या, यावर विद्यापीठासह सर्व महाविद्यालयांमध्ये चर्चा सुरू आहे. गेल्या वर्षभरात वेगवेगळ्या कला सादर करणाऱ्या विद्यार्थ्यांचा अभ्यासक्रम ऑनलाइन वर्गांच्या माध्यमातून पूर्ण करण्याचा प्रयत्न करण्यात आला आहे. या अभ्यासक्रमामधील लेखी परीक्षेचा भागही शिकवला असल्याने ऑनलाइन पद्धतीने लेखी परीक्षा घेणे शक्य आहे. प्रत्यक्ष सादरीकरणाची परीक्षा कशी घ्यायची, यावर मार्ग काढण्याचे प्रयत्न सुरू असल्याचे पुणे विद्यापीठाच्या ललित कला केंद्रातर्फे स्पष्ट करण्यात आले आहे. वर्षभर ऑनलाइन उपक्रम आणि शिक्षणाच्या माध्यमातून आम्ही विद्यार्थ्यांना अभ्यासक्रमातील लेखी भाग शिकवण्याचा पूर्ण प्रयत्न केला असून, बहुतांश अभ्यासक्रम शिकवून झाला आहे. आता मुद्दा सादरीकरणाचा राहतो. त्यासाठीही आम्ही प्रयत्न करीत असून परीक्षेपूर्वी विद्यार्थी आणि त्यांच्या गुरूंना किमान दहा दिवस एकमेकांसमोर बसून अध्यापन आणि प्रशिक्षण घेता यावे, असा आमचा प्रयत्न आहे. मे महिनाअखेरीस आम्ही परीक्षा घेण्याचा विचार करीत आहोत. - डॉ. प्रवीण भोळे, विभागप्रमुख, ललित कला केंद्र

from Career News in Marathi: Career News, मराठी Career बातम्या | Maharashtra Times https://ift.tt/3thgiHb
via IFTTT