चिंता अकरावीच्या प्रवेशाची; दहावी मूल्यमापनाचा निर्णय अद्याप नाही

म. टा. प्रतिनिधी, नाशिक राज्य माध्यमिक व उच्च माध्यमिक शिक्षण मंडळामार्फत यंदा दहावीच्या परीक्षा रद्द करण्यात आल्या आहेत. परंतु, पुढच्या वर्गात प्रवेशासाठी आवश्यक असणारे मूल्यमापन कसे होणार याबाबत अद्याप निर्णय घेण्यात आलेला नसल्याने आता विद्यार्थी-पालकांना अकरावी प्रवेशाची चिंता सतावत आहे. बोर्डाच्या परीक्षा झाल्यानंतर ज्युनिअर कॉलेजमध्ये अकरावीला प्रवेश घेण्यासाठी या परीक्षांचे मार्क ग्राह्य धरले जातात. गुणवत्तेनुसार सामान्यत: अधिक गुण मिळविणारे विद्यार्थी सायन्स, त्यानंतर कॉमर्स व शेवटी आर्ट असा विद्यार्थ्यांचा प्रवेशासाठी प्राधान्यक्रम असतो. परंतु, यंदा परीक्षाच होणार नसल्याने विद्यार्थ्यांना कोणत्या आधारे अकरावीला प्रवेश द्यायचा हे अद्यापही निश्चित नसल्याने अनेक विद्यार्थी आणि पालक संभ्रमात आहेत. वर्षभर केलेल्या मूल्यमापनाच्या आधारे किंवा महाविद्यालयीन स्तरावर प्रवेश परीक्षा घेऊन अकरावीला प्रवेश देण्याबाबत शैक्षणिक वर्तुळात चर्चा सुरू आहे. मात्र, राज्य मंडळाने निर्णय घेतल्यानंतरच याबाबतचा संभ्रम दूर होणार आहे. गेल्या वर्षी राज्य मंडळामार्फत घेण्यात आलेल्या दहावीच्या परीक्षेत नाशिक जिल्ह्याचा निकाल ९४.९३ टक्के लागला होता. तसेच शहरात उपलब्ध असलेल्या ६० ज्युनिअर कॉलेजमधील २५ हजार २७० जागांपैकी १९ हजार ७०० जागांवर प्रवेश निश्चित करण्यात आले होते. त्यामुळे शैक्षणिक वर्ष २०२०-२१मध्ये अकरावीच्या शहरात ५ हजार ५७० जागा शिल्लक राहिल्या होत्या. यंदा परीक्षाच होणार नसल्याने दहावीचा निकाल १०० टक्के लागणार आहे. सर्वच विद्यार्थी पास होणार असल्याने शहरातील ज्युनिअर कॉलेजमधील जागा कमी पडण्याचे स्पष्ट चित्र आहे. शिक्षण विभागामार्फत बैठक दहावीच्या परीक्षा रद्द झाल्यानंतर अकरावीला कोणत्या आधारावर विद्यार्थ्यांना प्रवेश द्यायचा याबाबात शिक्षण विभागामार्फत विविध बैठकीचे आयोजन केले जात आहे. पहिल्या टप्प्यात शिक्षण विभागातील अधिकारी व बोर्डाच्या अधिकाऱ्यांच्या बैठका झाल्या असून, दुसऱ्या टप्प्यात विविध महाविद्यालयांमधील प्राचार्यांच्या बैठका घेतल्या जात आहेत. या बैठकांमधील सूचनांनंतरच अकरावी प्रवेशाबाबत निश्चित धोरण ठरविले जाणार असल्याचे शालेय शिक्षणमंत्री वर्षा गायकवाड यांनी ट्विटरच्या माध्यमातून स्पष्ट केले आहे.

from Career News in Marathi: Career News, मराठी Career बातम्या | Maharashtra Times https://ift.tt/2S5vgSR
via IFTTT