मुंबई विद्यापीठात लसीकरण; १० लाख विद्यार्थ्यांना होणार लाभ

म. टा. विशेष प्रतिनिधी मुंबई : करोनाचा वाढता प्रादुर्भाव पाहता देशातील १८ वर्षांवरील (18+ vaccination in maharashtra) सर्व नागरिकांना आता लस दिली जाणार आहे. यात राज्यातील उच्च शिक्षण घेणाऱ्या सुमारे ३६ लाख ८७० विद्यार्थ्यांना विद्यापीठ आणि कॉलेजांमध्ये लस दिली जाईल. मुंबई विद्यापीठात (Mumbai University) याचे सुमारे दहा लाख लाभार्थी विद्यार्थी असतील. वाढत्या करोनाच्या पार्श्वभूमी वर राज्यातील अकृषी विद्यापीठांच्या सर्व कुलगुरूंसोबत उच्च व तंत्र शिक्षणमंत्री उदय सामंत यांच्या अध्यक्षतेखाली कॉलेज आणि विद्यापीठीय परीक्षांबाबत गुरुवारी दूरदृश्यप्रणालीच्या माध्यमातून बैठक झाली. मुख्यमंत्री उद्धव ठाकरे यांनी केलेल्या विनंतीनुसार राज्यातील १८ वर्षांवरील नागरिकांना लास देण्याचा निर्णय केंद्र सरकारने घेतला आहे. याची अंमलबजावणी लवकरच होणार आहे. करोनाचा वाढता प्रादुर्भाव पाहता १८ वर्षांवरील विद्यार्थ्यांना लस मिळणे आवश्यक आहे. विद्यार्थ्यांच्या आरोग्याची पूर्ण काळजी घेऊन हे लसीकरण करण्यात येणार आहे. यासाठी आरोग्य यंत्रणेशी चर्चा करून पुढील निर्णय घेण्यात येणार आहे, असे सामंत यांनी सांगितले होते. यानुसार जास्तीत जास्त विद्यार्थ्यांनी यासाठी नोंदणी करावी आणि याचा लाभ घ्यावा या उद्देशाने विद्यापीठाने जनजागृती मोहिम हाती घ्यावी, अशी मागणी युवा सेना अधिसभा सदस्यांनी विद्यापीठाकडे केली आहे. या संदर्भात त्यांनी विद्यापीठाला एक पत्र देऊन याबाबत विशेष मोहिम हाती घेण्याची मागणी केली आहे.

from Career News in Marathi: Career News, मराठी Career बातम्या | Maharashtra Times https://ift.tt/2QDIB4M
via IFTTT