Virginity Test: अखेर 'कौमार्य चाचणी' MBBS अभ्यासक्रमातून बाद

म. टा. प्रतिनिधी, नाशिक महाराष्ट्र आरोग्य विज्ञान विद्यापीठामार्फत एमबीबीएसच्या अभ्यासक्रमातून ''चा भाग () वगळण्याचा निर्णय अखेर घेण्यात आला आहे. अंधश्रद्धा निर्मूलन समितीच्या मागणीनुसार विद्यापीठाने हा निर्णय घेतला आहे. शैक्षणिक वर्ष २०१९-२० पासून हा भाग अभ्यासक्रमातून वगळल्याचे विद्यापीठामार्फत सांगण्यात आले. एमबीबीएस अभ्यासक्रमातील द्वितीय वर्षाच्या न्यायवैद्यकशास्त्र या विषयामध्ये 'टू फिंगर टेस्ट'चा उल्लेख करण्यात आला आहे. या चाचणीनुसार बलात्कारपीडित महिलेच्या गुप्तांगाची बोटाने किंवा प्रोबने तपासणी करून तिचा संभोग झाला आहे किंवा नाही ते ठरविले जाते. स्त्रीच्या कौमार्य पटलाचे माप व योनी मार्गाची लवचिकता याचे परीक्षण केले जाते. ही चाचणी कशी घ्यावी हे वैद्यकीय अभ्यासक्रमात शिकवले जाते. तसा उल्लेखही संबंधित पुस्तकात आढळतो. मात्र, ही चाचणी अवैज्ञानिक व अशास्त्रीय आहे, असा दावा महाराष्ट्र अंधश्रद्धा निर्मूलन समितीमार्फत करण्यात आला होता. अभ्यासक्रमात खरी कुमारी व खोटी कुमारी याचे काही निकषही देण्यात आले आहेत. कौमार्य हा अत्यंत व्यक्तिगत विषय असून, या चाचणीच्या नावाखाली स्त्रीच्या मानवी हक्कांचे उल्लंघन होत आहे. त्यामुळे ही चाचणी अभ्यासक्रमातून वगळण्याची मागणी अंधश्रद्धा निर्मूलन समितीमार्फत करण्यात आली होती. या मागणीनुसार, आरोग्य विद्यापीठामार्फत डॉ. हेमंत गोडबोले व डॉ. शैलेश मोहिते यांची समिती नियुक्त करण्यात आली होती. या समितीच्या अहवालानुसार, २०१९-२० या शैक्षणिक वर्षापासून कौमार्य चाचणी हा भाग 'एमबीबीएस'च्या अभ्यासक्रमातून वगळल्याचे आरोग्य विद्यापीठामार्फत सांगण्यात आले आहे. आता मेडिकल कौन्सिलकडे पाठपुरावा महाराष्ट्र आरोग्य विद्यापीठाने अभ्यासक्रमातून हा भाग वगळलेला असला तरी अद्याप पुस्तकांमध्ये या चाचणीचा उल्लेख असून, ही पुस्तके विद्यार्थ्यांपर्यंत पोहोचणार आहेतच. तसेच हा निर्णय महाराष्ट्रापुरता नव्हे, तर देशभरात लागू होणे आवश्यक आहे. त्यामुळे पुस्तकांमधूनही या चाचणीचा उल्लेख वगळण्यासाठी मेडिकल कौन्सिलकडे पाठपुरावा करणार असल्याचे 'अंनिस'ने स्पष्ट केले. कौमार्य चाचणी ही अवैद्यकीय असल्याचे अनेक तज्ज्ञ डॉक्टरांमार्फत सांगण्यात आले होते. वर्धा येथील सेवाग्राम रुग्णालयाचे प्रा. डॉ. इंद्रजीत खांडेकर यांनीही याबाबत अहवाल सादर केला होता. जातपंचायतीकडून होत असलेल्या कौमार्य चाचणीवर आमच्या पुढाकारामुळे बंदी घालण्यात आली आहे. मात्र, हा भाग अभ्यासक्रमातून वगळणेही गरजेचे होते. - कृष्णा चांदगुडे, कार्यवाह, महाराष्ट्र अंधश्रद्धा निर्मूलन समिती

from Career News in Marathi: Career News, मराठी Career बातम्या | Maharashtra Times https://ift.tt/3xfcI1y
via IFTTT