एलएलएमची परीक्षा अखेर पुढे ढकलली; पेपरदरम्यान सुट्टीची मागणी अधांतरीच

म. टा. विशेष प्रतिनिधी मुंबई : मुंबई विद्यापीठाच्या एलएलएमच्या पाचव्या फेरीत प्रवेश मिळालेल्या विद्यार्थ्यांची प्रवेश प्रक्रिया १० एप्रिल रोजी सुरू झाली. यानंतर अवघ्या सव्वा महिन्यातच, म्हणजे १७ मे रोजी परीक्षेचे आयोजन करण्यात आले आहे. यामुळे या विद्यार्थ्यांना अभ्यासासाठी एक महिनाही पुरेसा मिळालेला नाही. म्हणून परीक्षेचे सुधारित वेळापत्रक जाहीर करावे, अशी मागणी विद्यार्थ्यांनी केली होती. यानुसार विद्यापीठाने आता एलएलएमची परीक्षा १ जूनपासून सुरू करण्याचा निर्णय घेतला आहे. मुंबई विद्यापीठाच्या एलएलएमच्या पहिल्या सत्राची परीक्षा १७ मेपासून सुरू होणार आहे. मात्र अजूनही अभ्यासक्रमासाठी ऑनलाइन प्रवेश प्रक्रिया संपली आहे, असे विद्यापीठाने अधिकृतपणे जाहीर केले नाही. ही प्रक्रिया ७ मे रोजी संपेल, असे वेबसाइटवर दाखविण्यात आले होते. मात्र अद्यापही अर्ज करण्याचा पर्याय खुला आहे. याचबरोबर विद्यार्थ्यांचे परीक्षा अर्जही भरून घेण्यात आलेले नाहीत. एलएलएम प्रथम वर्ष प्रवेशासाठी सीईटी पार पडल्यावर ऑनलाइन प्रवेशप्रक्रियेला सुरूवात झाली. यंदा प्रवेश परीक्षा लांबली होती. यामुळे प्रवेशही लांबले होते. पाचव्या फेरीची प्रवेश प्रक्रिया १० एप्रिल पासून सुरू करण्यात आली आहे. मात्र ही प्रक्रिया कधी संपेल यानंतर सहावी यादी जाहीर होणार की नाही याबाबत कोणतीही स्पष्टता देण्यात आलेली नाही. यामुळे प्रवेश न मिळालेले आणि प्रतीक्षा यादीतील विद्यार्थी संभ्रमात आहेत. असे असले तरी १० एप्रिल रोजी प्रवेश घेतलेल्या विद्यार्थ्यांना एका महिन्यानंतर ताबडतोब परीक्षेला सामोरे जावे लागणार आहे. सध्याच्या वेळापत्रकात सलग पेपर आहेत. विद्यार्थी आता परीक्षेला सामारे जातीलही. मात्र वेळापत्रक सुधारित करून, प्रत्येक पेपरच्या दरम्यान एक तरी सुट्टी द्यावी, अशी मागणी स्टुडंट लॉ कौन्सिलचे अध्यक्ष सचिन पवार यांनी केली होती. त्यामुळे विद्यार्थ्यांना अभ्यासासाठी वेळ मिळाला असता. याबाबत त्यांनी कुलगुरुंना पत्र लिहले होते. याची दखल घेऊन विद्यापीठाने आता ही परीक्षा १ जूनपासून सुरू करण्याचा निर्णय घेतला आहे. मात्र प्रत्येक पेपरदरम्यान सुट्टीची मागणी मान्य झालेली नाही. याबाबत विद्यार्थी नाराजी व्यक्त करत आहेत.

from Career News in Marathi: Career News, मराठी Career बातम्या | Maharashtra Times https://ift.tt/3uCeEAH
via IFTTT