पुणे विद्यापीठाचा दृष्टीहिनांसाठी ऑनलाइन परीक्षेचा 'डोळस' प्रयोग

म. टा. प्रतिनिधी, पुणे सावित्रीबाई फुले पुणे विद्यापीठाने ऑनलाइन परीक्षेसाठी प्रॉक्टर्ड पद्धतीअंतर्गत तयार केलेल्या '' या विशेष प्रणालीमुळे मंगळवारी एका अंध विद्यार्थ्याला सहायकाशिवाय ऑनलाइन स्वरूपातच परीक्षा देता आली. हा विद्यार्थी एलएलबीच्या शेवटच्या वर्षात शिकत आहे. विद्यापीठाने यशस्वीपणे राबविलेल्या या प्रयोगामुळे साडेसहाशेपेक्षा अधिक अंध विद्यार्थ्यांना आता या प्रणालीद्वारे परीक्षा देणे अधिक सुलभ होणार आहे. युवराज झंजाडे, असे परीक्षा दिलेल्या विद्यार्थ्याचे नाव आहे. युवराजसारखे वेगवेगळ्या शाखांमध्ये शिक्षण घेणारे सुमारे ६५०पेक्षा अधिक विद्यार्थी आहेत. या सर्वच विद्यार्थ्यांना प्रॉक्टर्ड पद्धतीने ऑनलाइन परीक्षा द्यावी लागणार होती. परीक्षा ऑनलाइन असल्याने या विद्यार्थ्यांना सुरुवातीला विद्यापीठाने वीस मिनीटांची अतिरिक्त वेळ आणि सहायकाची मुभा दिली होती. परंतु, शहरातील करोनाची परिस्थिती पाहता या विद्यार्थ्यांना सहायक मिळणे अत्यंत अवघड होते. सहायकांमुळे विद्यार्थ्यांनाही करोना संसर्ग होण्याचा धोका असल्याने अंध विद्यार्थ्यांसमोर परीक्षा कशी द्यायची, असा प्रश्न निर्माण झाला होता. या संदर्भात त्यांनी वारंवार विद्यापीठाकडे पाठपुरावा केल्यानंतर विद्यापीठाचे परीक्षा संचालक महेश काकडे आणि विद्यापीठातील तंत्रज्ञांच्या टीमने परीक्षेसाठी वापरल्या जात असलेल्या अॅप्लिकेशनमध्ये बदल करून, त्यात ऑडिओची सुविधा उपलब्ध करून दिली. परीक्षेत विचारल्या जाणारा प्रश्न, परीक्षेच्या वेळेबाबतचे संकेत, उत्तर नोंदवले गेल्याचे संकेत आणि उत्तरांच्या पर्यायांचा ऑडिओ विद्यार्थ्यांना ऐकता येईल आणि विद्यार्थ्यांनी दिलेले उत्तर रेकॉर्ड होऊन संबंधित पर्याय निवडला जाईल, अशी व्यवस्था अॅप्लिकेशनमध्ये करण्यात आली. याची यशस्वी चाचणी झाल्यानंतर मंगळवारी अखेर युवराजने यशस्वीरीत्या पहिला पेपर सोडवला असून, पुढील काही दिवसांमध्ये याच पद्धतीचा वापर करून विद्यार्थी ऑनलाइन परीक्षा देऊ शकणार आहेत. अंध विद्यार्थ्यांना सहायकाशिवाय परीक्षा देण्यासाठी तयार करण्यात आलेली ही प्रणाली वापरणारे सावित्रीबाई फुले हे देशभरात एकमेव विद्यापीठ ठरले असून, या प्रयोगाचे शैक्षणिक क्षेत्रातून कौतुक केले जात आहे. बरेच दिवस प्रयत्न केल्यानंतर विद्यापीठाच्या तांत्रिक विभागाने ही अवघड गोष्ट शक्य करून दाखवली. देशात अशा पद्धतीने परीक्षा घेणारे सावित्राबाई फुले पुणे विद्यापीठ पहिलेच ठरणार आहे. विद्यापीठात असलेल्या कुशल तंत्रज्ञांच्या प्रयत्नांमुळे आणि अंध विद्यार्थ्यांच्या पाठपुराव्यामुळे ही गोष्ट शक्य झाली. - महेश काकडे, परीक्षा संचालक, सावित्रीबाई फुले पुणे विद्यापीठ

from Career News in Marathi: Career News, मराठी Career बातम्या | Maharashtra Times https://ift.tt/3bV7cth
via IFTTT