चंद्राचे छायाचित्र साकारले ५० हजार फ्रेम्समधून

म. टा. प्रतिनिधी, पुणे पुण्यातील सोळा वर्षीय या विद्यार्थ्याने ५० हजार फ्रेम वापरून काढले आहे. या छायाचित्रात दिसणारी विवरे, पठारे, दऱ्यांसह विविधरंगी खनिजांनीयुक्त चंद्राचा भूप्रदेश पाहून प्रथमेशवर जगभरातून कौतुकाचा वर्षाव होत आहे. प्रथमेशने विद्या भवन हायस्कूलमधून नुकतीच दहावी पूर्ण केली असून, तो पुण्यातील ज्योतिर्विद्या परिसंस्थेचा सभासद आहे. गेली तीन वर्षे संस्थेमध्ये तो खगोलीय छायाचित्रणाचे प्रशिक्षण घेत आहे. संस्थेचा पाच इंची व्यासाचा सेलेस्ट्रॉन टेलिस्कोप आणि झेडडब्ल्यूओ एएसआय १२० एमसी या सीसीडी कॅमेराच्या साह्याने त्याने कौतुकाचा विषय ठरलेले चंद्राचे छायाचित्र काढले आहे. 'महाराष्ट्र टाइम्स'शी बोलताना प्रथमेश म्हणाला, 'चंद्रावरील तपशील स्पष्ट दिसावेत यासाठी एका छायाचित्राऐवजी अनेक छायाचित्रांच्या एकत्रिकरणातून चंद्राचे एक स्पष्ट छायाचित्र विकसित केले आहे. त्यासाठी टेलिस्कोप आणि सीसीडी कॅमेराच्या साह्याने चंद्राच्या विविध ३८ भागांचे आणि प्रत्येकी सुमारे दोन हजार फ्रेम्स असलेले चार तासांचे व्हिडिओ रेकॉर्ड केले. या रेकॉर्डिंगमधून ५० हजार चांगल्या फ्रेम्स निवडून त्यांतून चंद्राच्या ३८ विविध भागांची छायाचित्रे तयार केली. या ३८ छायाचित्रांना एकत्र जोडून चंद्राचे अखंड आणि तपशीलवार छायाचित्र तयार झाले. चंद्राचे एक छायाचित्र बनवण्यासाठी सुमारे १८६ जीबीच्या छायाचित्रांचा डेटा वापरण्यात आला असून, सॉफ्टवेअरमध्ये त्याच्यावर प्रक्रिया होऊन एक छायाचित्र तयार होण्यासाठी सलग ४० तासांचा कालावधी लागला. मात्र, या सर्व प्रयत्नांतून तयार झालेला फोटो पाहून खूप आनंद झाला. या छायाचित्रात चंद्राच्या पृष्ठभागावरील बारीकसारीक तपशील तर दिसत आहेतच; पण साध्या डोळ्यांना न जाणवणारे चंद्रावरील विविध रंगांचे भूप्रदेशही दिसत आहेत.' प्रथमेशने चंद्राचे हे छायाचित्र 'रेडिट' आणि 'इन्स्टाग्राम'वर पोस्ट केले आणि लगेचच ते जगभर व्हायरल झाले. अनेक खगोलशास्त्रज्ञ आणि छायाचित्रकारांनी या छायाचित्रासाठी प्रथमेशचे कौतुक केले आहे. माध्यमांनीही चंद्राच्या या अनोख्या छायाचित्राला मोठी प्रसिद्धी दिली. चंद्राचे छायाचित्र काढण्यासाठी ज्योतिर्विद्या परिसंस्थेतील वरिष्ठ सभासदांसोबत जगभरातील अनेक खगोलीय छायाचित्रकारांचे मार्गदर्शन लाभल्याचे प्रथमेशने सांगितले. खगोलशास्त्र आणि खगोल भौतिकशास्त्रातच करिअर करायची प्रथमेशची इच्छा आहे.

from Career News in Marathi: Career News, मराठी Career बातम्या | Maharashtra Times https://ift.tt/33VQoOi
via IFTTT