पुणे विद्यापीठ यूजी, पीजी प्रवेशांसाठी ऑनलाइन अर्जांना सुरुवात

म. टा. प्रतिनिधी, पुणे सावित्रीबाई फुले पुणे विद्यापीठाच्या पदवी, पदव्युत्तर, एकात्मिक, आंतरविद्याशाखेच्या अभ्यासक्रमांना प्रवेश घेण्यासाठी यंदाही ऑनलाइन प्रवेश परीक्षा घेण्यात येणार आहे. त्यासाठी इच्छुक विद्यार्थ्यांना सोमवार, १४ जूनपासून ऑनलाइन पद्धतीने अर्ज करता येणार आहे. या प्रवेश परीक्षेची तारीख विद्यापीठाच्या वेबसाइटवर कालांतराने जाहीर करण्यात येईल, अशी माहिती शैक्षणिक विभागाने दिली आहे. कमी खर्चात उत्तम प्रकारचे शिक्षण मिळत असल्याने, विद्यापीठाच्या शैक्षणिक विभागात प्रवेश मिळावा, यासाठी विद्यार्थी प्रयत्नशील असतात. त्यामुळे या प्रवेशप्रक्रियेची विद्यार्थी आतुरतेने वाट पाहतात. करोनाच्या प्रादुर्भावामुळे यंदाही प्रवेश परीक्षा ऑनलाइन घेण्याची तयारी विद्यापीठाने केली आहे. पुणे विद्यापीठाच्या शैक्षणिक विभागाने संकुलातील (कॅम्पस) विविध अभ्यासक्रमांच्या ऑनलाइन प्रवेश प्रक्रियेबाबतचे सविस्तर परिपत्रक प्रसिद्ध केले आहे. या प्रवेश परीक्षेसाठी विद्यार्थ्यांना चार जुलैपर्यत अर्ज करता येणार आहे. विलंब शुल्क भरून १० जुलैपर्यंत अर्ज करण्याची सुविधा उपलब्ध करून दिली आहे. प्रवेश परीक्षा १०० गुणांची होणार असून, त्यासाठी एक तासाचा कालावधी देण्यात आला आहे. 'सेक्शन ए'मध्ये सामान्य ज्ञानावर आधारित प्रश्न विचारण्यात येतील. त्यासाठी २० गुण असतील. 'सेक्शन बी'मध्ये विषयनिहाय प्रश्नांसाठी ८० गुण आहेत. प्रवेश परीक्षेच्या निकालासाठी निगेटिव्ह मार्किंग प्रणालीचा वापर करण्यात येणार असल्याचे विद्यापीठ प्रशासनाने सांगितले. पुणे विद्यापीठातील डिप्लोमा आणि सर्टिफिकेट अभ्यासक्रमांसाठीही अशाच प्रकारची प्रवेश परीक्षा होणार असून, त्याबाबतची सविस्तर माहिती विद्यापीठाने वेबसाइटवर प्रकाशित केली आहे. अधिक माहिती www.unipune.ac.in या वेबसाइटवर मिळेल. विद्यापीठात प्रवेशासाठी चुरस सावित्रीबाई फुले पुणे विद्यापीठात पदविका, पदवी, पदव्युत्तर अभ्यासक्रमांसाठी साधारण अडीच हजार जागा आहेत. या जागांसाठी गेल्या वर्षी साधारण ३१ हजारांपेक्षा अधिक विद्यार्थ्यांनी अर्ज केले होते. करोनाच्या प्रादुर्भावामुळे विद्यापीठात प्रवेशासाठी प्रतिसाद कमी मिळेल, अशी अपेक्षा होती. मात्र, अर्जांच्या संख्येत वाढ झाली. त्यामुळे यंदाही प्रवेशासाठी चुरस राहणार असल्याचे विद्यापीठ प्रशासनाने सांगितले.

from Career News in Marathi: Career News, मराठी Career बातम्या | Maharashtra Times https://ift.tt/3cHhgq6
via IFTTT