करोनामुळे बदललेल्या परिस्थितीत कॉलेज निवडीचे निकष काय?

सुचित्रा सुर्वे, ग्रोथ सेंटर महाविद्यालयीन शिक्षण आणि जीवनाचा अनुभव घेण्याचं स्वप्न पुढे ढकललं गेल्यामुळे लवकरच महाविद्यालयात प्रवेश घेणारी सध्याची दहावीची बॅच निराश झाली आहे. सद्यस्थितीमुळे महाविद्यालयात जाणं, कॅम्पसमध्ये वेळ घालवणं, नवीन मित्र-मैत्रिणी बनवणं, प्रवास करणं इत्यादी गोष्टी करता येऊ शकत नाहीत. तसंच अजून एक वर्ष घरी बसून ऑनलाइन घालवण्याची कल्पना नक्कीच मनाला भावणारी नाही. या परिस्थितीचा परिणाम हळूहळू विद्यार्थ्यांच्या करिअर निवडीवरदेखील होऊ लागलेला आहे. कोणत्या महाविद्यालयात प्रवेश घ्यावा हा सध्या चर्चेचा विषय बनला आहे. छोट्या फ्रेम्स, सतत बदलणारे डीपी, अस्पष्ट व्हिडीओ आणि कनेक्टिव्हिटीचे प्रश्न यामुळे नवीन लोकांसोबत स्वतःला ऑनलाइन कनेक्ट करणं आव्हानात्मक वाटू शकतं. या वयात मित्र-मैत्रिणी हे विश्व असतं; यामुळे 'माझे मित्र जिथे प्रवेश घेणार आहेत त्याच पर्यायांची निवड मी करणार' याकडे विद्यार्थ्यांचा कल यावर्षी जास्त दिसून येत आहे. एखाद्यास समोरासमोर भेटता न येणं, समान आवडीनिवडींबाबत माहिती नसणं किंवा स्वतःहून एखाद्याशी संपर्क साधण्यास सक्षम नसणं इत्यादी घटकांमुळे नवीन मित्र-मैत्रिणी बनवण्याची प्रक्रिया गुंतागुंतीची वाटणं साहजिक आहे. ही ऑनलाइन मित्र बनवण्याची प्रक्रिया काहीशी सुलभ होण्यासाठी विविध मार्ग पुढे नमूद केलेले आहेत... - विद्यार्थ्यांनी एक गोष्ट लक्षात ठेवणं गरजेचं आहे, ती म्हणजे ऑनलाइन प्लॅटफॉर्मवरील लोकांशी सुरक्षितपणे कनेक्ट होणं शक्य आहे. कारण प्रत्येक शैक्षणिक संस्था अशाच ऑनलाइन प्लॅटफॉर्म्सचा वापर करतात जे त्यांच्या विद्यार्थ्यांसाठी सुरक्षित आहेत. त्याच बरोबर आता उपलब्ध असलेल्या विविध मेसेजिंग अ‍ॅप्सद्वारे विद्यार्थ्यांना त्यांच्या नवीन मित्रांसह संपर्कात राहणं शक्य आहे. - एखाद्या नवीन व्यक्तीशी संपर्क साधण्यासाठी स्वीकृत आणि अधिकृत ऑनलाइन प्लॅटफॉर्म्सचा वापर करा. - विविध सोशल मीडिया आणि गेमिंग प्लॅटफॉर्म्सचा वापर करून महाविद्यालयीन विद्यार्थी समविचारी समवयस्कांशी संपर्क साधू शकतात. मान्य आहे की, हा ऑनलाइन अनुभव प्रत्यक्ष 'हँग आऊट' करण्याच्या अनुभवाची जागा घेऊ शकत नाही. पण यामुळे मित्र बनवण्यास साहाय्य तरी होईल. - फोनवर किंवा व्हिडीओ कॉलवर बोलणं कनेक्शन सुरू करण्याचा एक चांगला मार्ग आहे. - ऑनलाइन कॉलेज सुरू झाल्यावर विद्यार्थ्यांनी ऑनलाइन सक्रिय राहणं सुरू केलं पाहिजे आणि त्यांची उपस्थिती जाणवण्यासाठी नियमित सहभाग घेणं आवश्यक आहे. अन्यथा नवीन लोकांशी कनेक्ट होण्याची संधी ते गमावू शकतात. - समविचारी व्यक्तींसोबत राहण्यासाठी विविध ऑनलाइन क्लब किंवा स्वयंसेवी संस्था किंवा अभ्यासक्रमा व्यतिरिक्त विविध उपक्रमांतील गटात सहभागी होणं साहाय्यक ठरेल. - विद्यार्थी त्यांचे ऑनलाइन मित्र कोठे आहेत हे शोधू शकतात, जर ते जवळपास असतील तर ते नक्कीच सामाजिक अंतरांच्या सर्व नियम लक्षात ठेवून भेटू शकतात. - विद्यार्थ्यांनी ऑनलाइन सुरक्षा नियमांचं पालन केलं पाहिजे. मैत्री करण्यापूर्वी किंवा ऑनलाइन फ्रेंड रिकवेस्ट स्वीकारण्यापूर्वी योग्य काळजी घेतली गेली पाहिजे. सध्याच्या अनिश्चित परिस्थितीत विद्यार्थ्यांनी हे लक्षात ठेवणं गरजेचं आहे की, हा एक तात्पुरता टप्पा असू शकेल आणि लवकरच (जरी कोणालाही नेमकी तारीख माहित नसली) ते कॅम्पसमध्ये असतील. या एका कारणामुळे आपल्या कॉलेजच्या निवडीवर आणि त्याद्वारे आपल्या संपूर्ण करिअरवर, जीवनावर परिणाम होऊ देऊ नका. लक्षात ठेवा, मित्र बनवण्याच्या संधी नक्कीच मिळतील तेव्हा योग्य ती कारणं लक्षात घेऊन महाविद्यालयीन प्रवेशाचा निर्णय घ्या.

from Career News in Marathi: Career News, मराठी Career बातम्या | Maharashtra Times https://ift.tt/3g5sXc8
via IFTTT