स्कूल फीमध्ये १५ टक्क्यांची कपात; निर्णय सर्व बोर्डाच्या शाळांना लागू

म. टा. प्रतिनिधी, पुणे करोनाच्या पार्श्वभूमीवर शाळांच्या २०२१-२२ या शैक्षणिक वर्षासाठीच्या एकूण शुल्कात १५ टक्के कपात करण्यात यावी, असा निर्णय शालेय शिक्षण विभागाने गुरुवारी घेतला. हा निर्णय राज्यातील सर्व मंडळाच्या सर्व शाळांना तातडीने लागू करायचा आहे. त्यामुळे पालकांना शुल्कात दिलासा मिळणार आहे. करोनाकाळात गेल्या दीड वर्षांपासून शाळांचे कामकाज ऑनलाइन स्वरूपातच सुरू आहे. या काळात अनेक पालकांची नोकरी गेली, वेतनात कपात झाली, तरीही खासगी शाळांकडून कोणतीही शुल्क कपात केली जात नव्हती. त्यामुळे त्याविरोधात राजस्थानातील काही पालकांनी सर्वोच्च न्यायालयात याचिका दाखल केली होती. त्यावेळी सर्वोच्च न्यायालयाने शुल्क कपात करण्याचे आदेश दिले होते. त्याच धर्तीवर राज्यातही शुल्क कपात केली जावी, अशी मागणी पालकांकडून केली जात होती. त्यानुसार मंत्रिमंडळाने काही दिवसांपूर्वी शुल्ककपात करण्याचा निर्णय घेतल्यावर त्यासंबंधीचा आदेश शालेय शिक्षण विभागाने गुरुवारी जाहीर केला. या निर्णयानुसार शाळांना शैक्षणिक वर्ष २०२१-२२ मध्ये एकूण शुल्कात १५ टक्के कपात करावी लागणार आहे. शाळा सुरू झाल्याने, ज्या विद्यार्थ्यांनी पूर्ण शुल्क भरले आहे, अशा विद्यार्थ्यांचे शुल्क पुढील हप्त्यात समायोजित करावे. त्याचप्रमाणे शुल्क समायोजित करणे शक्य नसल्यास, विद्यार्थ्यांना शुल्क परत करावे, अशा स्पष्ट सूचना देण्यात आल्या आहेत. कपात करण्यात आलेल्या शुल्काबाबत विवाद निर्माण झाल्यास, त्याची तक्रार विभागीय शुल्क नियामक समितीकडे किंवा विभागीय तक्रार निवारण समितीकडे करण्यात यावी. या दोन्ही समित्यांचा निर्णय अंतिम राहील, असे निर्णयात सांगण्यात आले आहे. त्याचप्रमाणे विद्यार्थ्याने शुल्क भरले नाही म्हणून त्याला ऑनलाइन शिक्षण घेण्यापासून रोखता येणार नाही; तसेच त्या विद्यार्थ्याचा निकालदेखील रोखता येणार नाही. हा निर्णय राज्यातील सर्व मंडळाच्या सर्व शाळांना लागू राहणार आहे, असे आदेशात नमूद करण्यात आले आहे. निर्णयाच्या विरोधात याचिका शालेय शिक्षण विभागाच्या १५ टक्के शुल्क कपातीच्या निर्णयाला महाराष्ट्र इंग्लिश स्कूल ट्रस्टीज असोसिएशनने (मेस्टा) तीव्र विरोध दर्शविला आहे. याबाबत आज, शुक्रवारी (१३ ऑगस्ट) निर्णयाच्या विरोधात न्यायालयात याचिका दाखल करण्यात येणार असल्याचे 'मेस्टा'चे अध्यक्ष संजय तायडे पाटील यांनी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/2UeHABV
via IFTTT