'स्वयम्'ची परीक्षा जाहीर; देशभरात २७६ विविध अभ्यासक्रमांच्या परीक्षा

म. टा. प्रतिनिधी, पुणे केंद्र सरकारच्या 'स्वयम्' या मुक्त शिक्षणाच्या उपक्रमाअंतर्गत येणाऱ्या २७६ विविध अभ्यासक्रमांच्या परीक्षा जाहीर करण्यात आल्या आहेत. २८ व २९ ऑगस्ट रोजी या परीक्षा देशातील १४१ शहरांमधील केंद्रांवर आयोजित केल्या जाणार आहेत. यासाठीची नोंदणी नॅशनल टेस्टिंग एजन्सी (एनटीए) या संस्थेच्या वेबसाइटवर सुरू करण्यात आली असून, विद्यार्थ्यांना अभ्यासक्रम निवडून परीक्षेसाठी नोंदणी करावी लागणार आहे. नोकरी, व्यवसाय सांभाळून; तसेच घरबसल्या वेगवेगळ्या विषयांचे ज्ञान घेण्यासाठी स्वयम् या उपक्रमाची निर्मिती करण्यात आली आहे. त्या अंतर्गत वेगवेगळ्या विषयांचा अभ्यासक्रम विद्यार्थ्यांना शिकता येतो. या अभ्यासक्रमांच्या जानेवारी २०२१ या सत्रासाठी परीक्षा घेण्यात येणार आहेत. ट्रॅव्हल अँड टुरिजम, प्रॉडक्शन मॅनेजमेंट, भारतीय इतिहास, संस्कृती, मार्केटिंग, ऑपरेशन मॅनेजमेंट, पाणीपुरवठा, नाट्यशास्त्र अशा वेगवेगळ्या २७६ अभ्यासक्रमांसाठी ही परीक्षा घेतली जाणार आहे. या सर्व अभ्यासक्रमांची सविस्तर यादी 'स्वयम्'च्या https://ift.tt/3fKau4g या वेबसाइटवर उपलब्ध आहे. येत्या २८ व २९ ऑगस्टला एकूण चार सत्रांमध्ये 'कम्प्युटर बेस्ड टेस्ट' या पद्धतीने ही परीक्षा होणार असून, त्यासाठी देशातील १४१ शहरांमधील विविध केंद्रांवर परीक्षा घेतल्या जाणार आहेत. संबंधित केंद्रांची यादीही 'स्वयम्'च्या वेबसाइटवर उपलब्ध असून, त्याच ठिकाणी विद्यार्थ्यांना परीक्षेसाठी अर्ज करता येणार आहेत. अर्ज करताना विद्यार्थ्यांना वैयक्तिक आणि शैक्षणिक माहिती भरावी लागणार आहे. त्यानंतर ज्या महाविद्यालयाच्या अंतर्गत शिक्षण घेत आहे त्या महाविद्यालयाचे नाव, अर्जदाराचा पत्ता, फोटो, सही अपलोडकरून अभ्यासक्रमाची निवड करणे बंधनकारक आहे. विद्यार्थ्यांना त्यांचे राज्य, शहर आणि परीक्षा केंद्राचीही निवड करावी लागणार आहे. परीक्षा केंद्राची निवड करताना तीन केंद्रांचा पर्याय देणे बंधनकारक असणार आहे. एका केंद्रावर जर १५ विद्यार्थ्यांपेक्षा कमी संख्या असल्यास त्या केंद्रावर परीक्षा होणार नसल्याने तीन परीक्षा केंद्रांचे पर्याय देणे बंधनकारक आहे. विद्यार्थ्यांसाठी महत्त्वाचे परीक्षा अर्ज भरण्याची मुदत : १२ ऑगस्ट प्रवेश परीक्षा शुल्क : ~ १,००० परीक्षेच्या तारखा : २८ व २९ ऑगस्ट देशातील परीक्षा होणारी शहरे : १४१ असा करा अर्ज - अर्ज करण्यासाठीची वेबसाइट : https://ift.tt/3fKau4g - वेबसाइट उघडल्यानंतर रजिस्टर म्हणून नोंदणी करा. - नोंदणी करताना वैयक्तिक माहिती, शैक्षणिक माहिती, संबंधित महाविद्यालय, विद्यार्थ्याचा पत्ता, फोटो, सही अपलोड करणे आवश्यक. - माहिती अपलोड केल्यानंतर अभ्यासक्रमाची निवड करून परीक्षा केंद्रांचे तीन पर्याय देणे बंधनकारक. - केंद्र निवड केल्यानंतर सबमिट करून ऑनलाइन शुल्क भरता येणार.

from Career News in Marathi: Career News, मराठी Career बातम्या | Maharashtra Times https://ift.tt/37FwUzl
via IFTTT