पुणे विद्यापीठात होणार 'इंडो-फ्रेंच समिट'

म. टा. प्रतिनिधी, पुणे भारत आणि फ्रान्स यांच्यातील संबंध दृढ करण्यासोबतच शिक्षण, संशोधन आणि नवसंकल्पनांना चालना देण्यासाठी सुरू झालेली 'इंडो-फ्रेंच नॉलेज समिट' येत्या २४ व २६ नोव्हेंबर रोजी ऑनलाइन पद्धतीने होणार आहे. या परिषदेला शिक्षणमंत्री धर्मेंद्र प्रधान यांच्यासह उच्चपदस्थ अधिकारी उपस्थित राहणार आहेत. परिषदेत आरोग्य (संसर्गजन्य आजार), सागरी विज्ञान, कृत्रिम बुद्धिमत्ता, शाश्वत ऊर्जा, हरित रसायनशास्त्र, जैवतंत्रज्ञान आणि नैसर्गिक संसाधने आदी विषयांवर चर्चा होणार आहे. यातून अनेक करार, एकत्रित संशोधन प्रकल्प हाती घेण्याबाबत ठराव केले जातील. फ्रान्सच्या अध्यक्षांनी २०१८ मध्ये भारताला भेट दिली होती. त्या वेळी फ्रान्स दूतावासातर्फे ही परिषद आयोजित केली होती. पहिली परिषद २०१८ ला दिल्लीत, दुसरी फ्रान्समधील लिऑन येथे २०१९ मध्ये झाली. आता २०२१ मध्ये सावित्रीबाई फुले पुणे विद्यापीठाला ही परिषद घेण्याचा मान मिळाला आहे. या तीन दिवसीय ऑनलाइन परिषदेत पहिल्या दिवशी शिक्षणमंत्री धर्मेंद्र प्रधान, फ्रान्सचे उच्चशिक्षण, संशोधन व नवसंशोधनमंत्री फेडरिक्यू विडाल, केंद्र सरकारच्या पृथ्वी विज्ञान व विज्ञान व तंत्रज्ञान विभागाचे सचिव डॉ. एम. रवीचंद्रन, सावित्रीबाई फुले पुणे विद्यापीठाचे कुलगुरू डॉ. नितीन करमळकर यांच्या उपस्थितीत सुरुवात होणार आहे. असे व्हा सहभागी... परिषदेत विज्ञान विषयात आवड असणारे सर्व जण सहभागी होऊ शकतात. या परिषदेत सहभागी होण्यासाठी https://ift.tt/3nxzH6i लिंकवर नोंदणी करणे आवश्यक असल्याचे सावित्रीबाई फुले पुणे विद्यापीठाच्या नवोपक्रम, नवसंशोधन व साहचर्य विभागाच्या संचालिका डॉ. अपूर्वा पालकर यांनी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/3nEEWkV
via IFTTT