IIM CAT २०२१ परीक्षा देणाऱ्यांसाठी महत्वाचे निर्देश जाहीर

IIM CAT 2021: इंडियन इन्स्टिट्यूट ऑफ मॅनेजमेंट (IIM) अहमदाबादतर्फे २८ नोव्हेंबर रोजी भारतातील १५९ शहरांमधील ४०० परीक्षा केंद्रांवर कॅट २०२१ परीक्षेचे आयोजन केले जाणार आहे. अधिकृत नोटिफिकेशननुसार यावर्षी सुमारे २.३१ लाख विद्यार्थ्यांनी परीक्षेसाठी नोंदणी केली आहे. उमेदवारांना अधिकृत वेबसाइटवरुन प्रवेशपत्र डाऊनलोड करता येणार आहे. आयआयएमतर्फे परीक्षेचे दिशा निर्देश जाहीर करण्यात आले आहेत. कॅट २०२१ परीक्षा तीन सत्रांमध्ये आयोजित केली जाणार आहे. उमेदवारांना परीक्षा वेळेच्या किमान ३० मिनिटे आधी रिपोर्ट करणे गरजेचे आहे. परीक्षेला येताना उमेदवारांना प्रवेशपत्र सोबत आणणे अनिवार्य आहे. यासोबतच परीक्षेवेळी उमेदवारांनी पाळण्याचे दिशा निर्देश जाहीर करण्यात आले आहेत. सकाळचे सत्र सकाळी ८.३० ते १०.३० पर्यंत सुरू होईल आणि प्रवेश सकाळी ८.१५ वाजता बंद होईल. दुपारचे सत्र दुपारी १२.३० वाजता सुरू होईल आणि दुपारी २.३० पर्यंत चालेल. या परीक्षेवेळी परीक्षाकेंद्रात दुपारी १२.१५ नंतर उमेदवारांना प्रवेश दिला जाणार नाही. शेवटचे सत्र दुपारी ४.३० ते संध्याकाळी ६.३० पर्यंत असेल. यावेळी दुपारी ४.१५ नंतर कोणत्याही उमेदवारास प्रवेश दिला जाणार नाही. महत्वाचे निर्देश A4 आकाराच्या कागदावर प्रवेशपत्र प्रिंट करा. उमेदवाराचा फोटो आणि सही स्पष्टपणे छापलेली असेल तरच प्रवेशपत्र वैध असेल. कॅट परीक्षा केंद्रावर पडताळणीसाठी देण्यापूर्वी प्रवेशपत्रावर दिलेल्या जागेवर फोटो चिकटवा. CAT कॉम्प्युटर आधारित चाचणी (CBT) मोडवर घेतली जाईल. उमेदवारांना प्रत्येक विभागासाठी ४० मिनिटे आणि पीडब्ल्यूडी उमेदवारांना ५३ मिनिटे २० सेकंद दिले जातील. वेळ पूर्ण झाल्यानंतर संबंधित सेक्शन आपोआप बंद होईल. कॅट २०२१ परीक्षेतील काही प्रश्न बहुपर्यायी प्रश्नांवर (MCQ) आधारित असतील तर काही नॉन एमसीक्यू आधारित प्रश्न असतील. उमेदवारांना एसएमएस आणि ईमेलवर रिपोर्टींगची वेळ मिळेल. त्यानुसार त्यांना परीक्षा केंद्रावर रिपोर्टींग करावे लागेल. परीक्षा केंद्रात प्रवेश करताना उमेदवारांना हातात मेटल डिटेक्टर लावले जाईल. उमेदवारांना फक्त कॅट २०२१ प्रवेशपत्र, फोटो ओळखपत्र, मास्क, सॅनिटायझर, आवश्यक वैद्यकीय प्रमाणपत्र आणि प्रतिज्ञापत्र (असल्यास) सोबत ठेवण्याची परवानगी असेल. CAT परीक्षेचा नमुना IIM अहमदाबादतर्फे (IIM, Ahmedabad) २८ नोव्हेंबर रोजी परीक्षेचे आयोजन करण्यात आले आहे. गेल्यावर्षी एकूण ७६ प्रश्न विचारण्यात आले होते. यंदा कॅटमध्ये ६४ ते ६८ प्रश्न विचारले जाण्याची शक्यता वर्तवली जात आहे. प्रश्न तीन भागात विचारले जातील. शाब्दिक क्षमता आणि वाचन आकलन, वाचन, परिमाणात्मक क्षमता आणि डेटा इंटरप्रिटेशन आणि लॉजिकल रिझनिंगमधून प्रश्न येतील. प्रत्येक सेक्शन सोडवण्यासाठी विद्यार्थ्यांना ४०-४० मिनिटे दिली जाणार आहेत. अपंग व्यक्तींना (PH उमेदवार) प्रश्न सोडवण्यासाठी १३ मिनिटे २० सेकंदांचा अतिरिक्त वेळ मिळेल. प्रत्येक विभागातून २० ते २४ प्रश्न विचारले जातील. पेपरमध्ये मल्टिपल चॉइस आणि नॉन मल्टिपल चॉइस असे दोन्ही प्रश्न असतील. एमसीक्यूमध्ये निगेटिव्ह मार्किंगची असेल आणि नॉन MCQ मध्ये निगेटिव्ह मार्किंग नसणार आहे. CAT 2021 Admit Card: असे करा डाऊनलोड स्टेप १ : सर्वप्रथम अधिकृत वेबसाइट iimcat.ac.in वर जा. स्टेप २: वेबसाइटवर दिलेल्या प्रवेशपत्राच्या लिंकवर क्लिक करा. स्टेप ३: आता नोंदणी क्रमांक आणि पासवर्डच्या मदतीने लॉगिन करा. स्टेप ४: तुमचे प्रवेशपत्र स्क्रीनवर दिसेल. स्टेप ५: ते आता डाउनलोड करा. स्टेप ६: परीक्षा हॉलमध्ये नेण्यासाठी त्याची प्रिंट आउट घ्या. प्रवेशपत्र डाउनलोड केल्यानंतर उमेदवारांनी त्यांचे नाव, जन्मतारीख, अर्ज क्रमांक, श्रेणी, परीक्षा केंद्राचे नाव आणि पत्ता, कॅट २०२१ परीक्षेचा दिवस आणि शिफ्टच्या वेळेसह सर्व माहिती तपासून घेणे गरजेचे आहे. परीक्षेच्या दिवशी पाळल्या जाणार्‍या सर्व मार्गदर्शक सूचना प्रवेशपत्रावर देण्यात आल्या आहेत.

from Career News in Marathi: Career News, मराठी Career बातम्या | Maharashtra Times https://ift.tt/3qPSjAD
via IFTTT