IIT जम्मूमध्ये करोनाचा कहर, ऑनलाइन वर्ग घेण्याचा निर्णय

IIT Jammu: इंडियन इन्स्टिट्यूट ऑफ टेक्नॉलॉजी जम्मू काश्मीरमध्ये (Indian Institute of Technology) मध्ये करोना रुग्णसंख्या वाढत चालली आहे. यानंतर आयआयटी जम्मू प्रशासनाने ऑनलाइन वर्ग सुरू करण्याचा निर्णय घेतला आहे. आयआयटी जम्मूकडून यासंदर्भात नोटीस जाहीर करण्यात आली आहे. त्यानुसार आयआयटी जम्मूच्या कॅम्पसमध्ये घेण्यात आलेल्या आरटी-पीसीआर चाचणीत अनेकांना कोरोनाची लागण झाल्याचे आढळून आले आहे. आयआयटी जम्मूच्या कॅम्पसमध्ये वेळोवेळी करोना चाचणी केली जात आहे. गेल्या आठवड्यात कॅम्पसमध्ये ३०० लोकांची आरटी-पीसीआर चाचणी घेण्यात आली. त्यापैकी १८ जणांना करोनाची लागण झाली आहे. यामध्ये विद्यार्थी, प्राध्यापक आणि कर्मचारी यांचा समावेश असल्याचे आयआयटी जम्मूच्या नोटीसमध्ये म्हटले आहे. करोनाबाधित असलेल्या सर्वांना नियमानुसार क्वारंटाईनमध्ये ठेवण्यात आले असून डॉक्टरांची टीम त्यांच्यावर सतत लक्ष ठेवून आहे. करोना पॉझिटीव्ह आढळलेल्या बहुतेक लोकांमध्ये सौम्य किंवा कोणतीही लक्षणे नाहीत असे नोटीसमध्ये म्हटले आहे. आयआयटी जम्मूने ट्विट करुन दिलेल्या माहितीनुसार, आयआयटी जम्मू कॅम्पस सॅनिटाइज केले जात आहे. बहुतांश विद्यार्थी डिसेंबरमध्ये सेमिस्टर ब्रेकवर घरी गेले आहेत. त्यामुळे आयआयटी जम्मूचे सर्व वर्ग ऑनलाइन माध्यमातून होणार आहेत. तसेच कर्मचारी आणि प्राध्यापक पुढील सूचना मिळेपर्यंत घरून काम करणार आहेत. यासोबतच आयआयटी कॅम्पसमध्ये शंभर टक्के जणांचे लसीकरण झाल्याची माहितीही देण्यात आली आहे. देशात कोरोनाचे रुग्ण झपाट्याने वाढत आहेत. अशा परिस्थितीत अनेक राज्यांनी शाळा आणि महाविद्यालये बंद केली आहेत. करोना प्रसार रोखण्यासाठी विद्यार्थ्यांचे ऑनलाइन वर्ग घेतले जात आहेत.

from Career News in Marathi: Career News, मराठी Career बातम्या | Maharashtra Times https://ift.tt/3Fq7W5n
via IFTTT