प्रवेश परीक्षांचे भविष्य अधांतरी

म. टा. प्रतिनिधी, पुणे लॉकडाउन वाढल्यामुळे राज्य सामायिक परीक्षा कक्ष (सीईटी सेल), नॅशनल टेस्टिंग एजन्सीकडून (एनटीए), अकृषी विद्यापीठांच्या व सत्र परीक्षा तसेच विविध स्वायत्त महाविद्यालयांकडून विविध व्यावसायिक आणि बिगरव्यवसायिक अभ्यासक्रमांसाठी घेण्यात येणाऱ्या प्रवेश परीक्षा आता आणखी लांबणीवर पडल्या आहेत. या परीक्षा आता मे व जून महिन्याच्या अखेरीस होण्याची शक्यता वर्तविण्यात येत आहे. त्यामुळे या प्रवेश परीक्षांचा निकाल जाहीर होऊन, प्रवेश प्रक्रिया सुरू होण्याला जुलै उजाडण्याची होण्याची शक्यता आहे. त्यातच राज्यातील विद्यापीठांच्या सत्र परीक्षा आणि प्रवेश परीक्षाही आणखी लांबणीवर गेल्या आहेत. देशात १४ एप्रिलपर्यत लॉकडाउन होते. सीईटी सेल, एनटीए यांसारख्या प्रशासकीय यंत्रणांनी एप्रिलच्या अखेरीस आणि मे महिन्याच्या दुसऱ्या आठवड्यात परीक्षा घेण्याबाबत नियोजन केले. आता लॉकडाउन ३ मेपर्यत वाढल्याने; तसेच काही भागांत त्यानंतरही वाढण्याची शक्यता असल्याने या प्रवेश परीक्षा आणखी पुढे जाण्याची शक्यता आहे. लॉकडाउनमुळे एमसीए अभ्यासक्रमाची सीईटी परीक्षा ३० एप्रिल रोजी होणार होती. लॉकडाउन वाढल्याने ही परीक्षा अनिश्चित कालावधीसाठी पुढे ढकलण्यात आली आहे. सीईटी सेलने बीपीएड, एमपीएड, बीएड, एमएड, बीए/बीएस्सी बीएड या अभ्यासक्रमांच्या प्रवेश परीक्षांना ऑनलाइन पद्धतीने नोंदणी करण्याची मुदत २० एप्रिलपर्यत वाढविली. हॉटेल मॅनेजमेंट अँड केटरिंग टेक्नॉलॉजीच्या अभ्यासक्रमांना प्रवेश घेण्यासाठी होणाऱ्या बी-एचएमसीटी आणि एम-एचएमसीटी या प्रवेश परीक्षांना नोंदणी करण्याची मुदतवाढ १५ एप्रिलपर्यत दिली. त्याचप्रमाणे आर्किटेक्चरच्या एम-आर्च या पदव्युत्तर पदवी अभ्यासक्रमासाठी होणाऱ्या सीईटी प्रवेश परीक्षेसाठी नोंदणी करण्याची मुदत १५ एप्रिलपर्यत वाढवली. लॉकडाउन वाढल्याने या परीक्षांसाठी नोंदणी करण्याची मुदत वाढवावी लागणार आहे. या परीक्षांचे नियोजन मे किंवा जून महिन्यात करावे लागणार आहे. 'एनटीए'ने देशातील अभियांत्रिकी पदवी प्रवेशांसाठी होणारी जेईई मेन्स, तर वैद्यकीय पदवी अभ्यासक्रमांच्या प्रवेशासाठी होणारी नीट प्रवेश परीक्षा पुढे ढकलण्याचा निर्णय घेतला. 'जेईई'ची दुसरी पायरी असणारी अॅडव्हान्स परीक्षेचे भवितव्य अजूनही अधांतरी आहे. ही परिस्थिती असताना एनटीएने नॅशनल कौन्सिल फॉर हॉटेल मॅनेजमेंट (एनसीएचएम-जेईई), इंदिरा गांधी नॅशनल ओपन युनिव्हर्सिटी प्रवेश परीक्षा (पीएचडी, एमबीए), इंडियन कौन्सिल ॲग्रीकल्चर रिसर्च (आयसीएआर) जवाहरलाल नेहरू युनिव्हर्सिटी एंट्रन्स एक्झामिनेशन (जेएनयूईई) या प्रवेश परीक्षांचे नियोजन पुढे ढकलण्यात आले आहे. या प्रवेश परीक्षांसाठी ३० एप्रिलपर्यंत विद्यार्थ्यांना ऑनलाइन पद्धतीने नोंदणी करता येईल. सीएसआयआर नेट परीक्षेला १५ मेपर्यंत, तर ऑल इंडिया आयुष पोस्ट ग्रॅज्युएट एंट्रन्स टेस्टसाठी ३१ मेपर्यंत नोंदणी करता येणार आहे. सहायक प्राध्यापक होण्यासाठी घेण्यात येणारी यूजीसी - नेट परीक्षेसाठी नोंदणी करण्याची मुदत वाढवण्यात आली असून, आता विद्यार्थ्यांना १६ मेपर्यंत नोंदणी करता येईल. या सर्व प्रवेश परीक्षांचे नियोजन अनिश्चित काळासाठी पुढे ढकलण्यात आले आहे. विद्यार्थ्यांनी ताज्या माहितीसाठी सीईटी सेल आणि 'एनटीए'च्या वेबसाइटला भेट देण्याचे आवाहन करण्यात आले आहे. 'सीईटीच्या नोंदणीला मुदतवाढ द्यावी' इंजिनीअरिंग, फार्मसी अभ्यासक्रमाच्या प्रवेशासाठी होणारी एमएचटी - सीईटी पुढे ढकलण्यात आली आहे. आता ही परीक्षा मे महिन्याच्या दुसऱ्या किंवा तिसऱ्या आठवड्यात होण्याची शक्यता आहे. मात्र, विविध कारणांमुळे राज्यातील अनेक विद्यार्थी परीक्षेसाठी नोंदणी करण्यापासून वंचित राहिले आहेत. सध्या सीईटी परीक्षा पुढे ढकलल्याने ही परीक्षा देण्यासाठी इच्छुक असणाऱ्या विद्यार्थ्यांना नोंदणी करण्याची संधी मिळावी, अशी मागणी पालकांनी केली आहे. परीक्षा होणारच; पण केव्हा ते अनिश्चित राज्यातील अकृषी विद्यापीठांच्या अभ्यासक्रमांसाठी स्थानिक विद्यापीठ प्रशासनाकडून प्रवेश परीक्षा घेतल्या जातात. मात्र, लॉकडाउनमुळे या प्रवेश परीक्षा अनिश्चित काळासाठी पुढे ढकलण्यात आल्या आहेत. त्याचप्रमाणे राज्यातील विद्यापीठांच्या सत्र परीक्षांचा प्रश्न जैसे-थे आहे. 'परीक्षा कोणत्या पद्धतीने आणि किती कालावधीत घ्यायच्या हा प्रश्न अनुत्तरित आहे. यावर तोडगा काढण्यासाठी चार कुलगुरूंची समिती स्थापन करण्यात आली आहे. या समितीकडून राज्यपाल तथा कुलपती भगतसिंह कोश्यारी यांना अहवाल दिल्यानंतर परीक्षेबाबत निर्णय होणार आहे. राज्यातील विद्यापीठांच्या परीक्षा रद्द केलेल्या नसून, समितीच्या अहवालानंतर त्या घेण्यात येतील,' असा पुनरुच्चार उच्च व तंत्रशिक्षण मंत्री उदय सामंत यांनी सोमवारी केला आहे.

from Career News in Marathi: Career News, मराठी Career बातम्या | Maharashtra Times https://ift.tt/2RH5r8S
via IFTTT