व्यावसायिक शिक्षण ऑनलाइन; नोकरी करत शिकू इच्छिणाऱ्यांना लाभ

‌म. टा. विशेष प्रतिनिधी, मुंबई विद्यापीठ अनुदान आयोगाच्या सूचनेनुसार अखिल भारतीय तंत्रशिक्षण संस्थेने (एआयसीटीई) डेटा सायन्स, कम्प्युटर अॅप्लिकेशन असे काही आधुनिक पदव्युत्तर पदवी आणि पदविका अभ्यासक्रम राबविण्यास मान्यता देण्याचे सूतोवाच केले आहे. यामुळे नोकरी करून पदव्युत्तर पदवी शिक्षण घेऊ इच्छिणाऱ्या विद्यार्थ्यांना दिलासा मिळणार आहे. पात्र संस्थांना वेगळी मान्यता न घेता हे अभ्यासक्रम राबविता येतील. करोनाकाळत ऑनलाइन शिक्षणाचे फायदे समोर आल्यानंतर अनेक विद्यार्थ्यांना शिक्षणसंधी उपलब्ध व्हावी, या उद्देशाने 'एआयसीटीई'ने काही अभ्यासक्रम ऑनलाइन अथवा दूर व मुक्त अध्ययन संस्थांच्या माध्यमातून सुरू करण्यास मान्यता देण्याचा निर्णय घेतला आहे. यामध्ये १२० क्रेडिट्सचा तीन वर्षांचा दहावीनंतरचा पदविका अभ्यासक्रमाचा समावेश करण्यात आला आहे. तर दोन वर्षांचा मॅनेजमेंट, कम्प्युटर अॅप्लिकेशन्स, पदव्युत्तर पदविका या ८० क्रेडिट्सच्या अभ्यासक्रमांना परवानगी देण्यात येणार असल्याचे सांगण्यात आले आहे. तसेच एक वर्षांपेक्षा अधिक व दोन वर्षांपेक्षा कमी कालावधीच्या ४० क्रेडिट्सचे पदव्युत्तर प्रमाणपत्र अभ्यासक्रम सुरू करण्यास मुभा देण्यात येणार आहे. यामध्ये डेटा सायन्स, कृत्रिम बुद्धिमत्ता, कम्प्युटी अॅप्लिकेशन्स, लॉजिस्टिक्स, ट्रॅव्हल अॅण्ड टुरिझम अशा अभ्यासक्रमांचा समावेश असणार आहे. शिक्षक आणि विद्यार्थी यांच्यातील दरी कमी करण्याच्या उद्देशाने या अभ्यासक्रमांचा मोठा फायदा होणार आहे. प्रात्यक्षिक आणि कार्य अनुभव यासाठी काही प्रमाणात प्रत्यक्ष वर्गातील प्रशिक्षणाची तरतूदही करण्यात आली आहे. हे अभ्यासक्रम शिकवताना स्वयम्, मूक्स, ई-बुक्स, व्हिडिओ लेक्चर्स, ऑडिओ-व्हिज्युअल इंटरॅक्टिव्ह मटेरिअल यांसारख्या व्यासपीठांचा वापर करण्याच्या सूचनाही यात करण्यात आल्या आहेत. पात्रता निकष हे अभ्यासक्रम सुरू करणाऱ्या संस्थेला नॅक मूल्यांकनामध्ये किमान ३.२६ किंवा त्यापेक्षा अधिक गुण असणे आवश्यक आहे किंवा राष्ट्रीय मुल्यांकनात १००० पैकी ७०० पेक्षा अधिक गुण मिळणे आवश्यक आहे. हे निकष पूर्ण करणाऱ्या संस्थेला 'एआयसीटीई'ची मान्यता नसतानाही हे ऑनलाइन अभ्यासक्रम सुरू करता येणार आहेत. मात्र, संस्थेने 'एआयसीटीई'कडे अभ्यासक्रम सुरू करण्यापूर्वी पात्रता निकष पूर्ण करत असल्याचे पत्र सादर करणे आवश्यक असणार आहे. तर नॅकमध्ये ३.०१ गुण मिळालेले व राष्ट्रीय मूल्यांकनात ६५०च्या वर स्थान मिळालेल्या संस्थांना मान्यता घेऊन हे अभ्यासक्रम सुरू करता येणार आहे. या अभ्यासक्रमांचा समावेश नाही या योजनेत इंजिनीअरिंग आणि टेक्नॉलॉजी शाखेतील पारंपरिक अभ्यासक्रम, फार्मसी, आर्किटेक्चर, हॉटेल मॅनेजमेंट, उपयोजित कला, डिझाइन अशा अभ्यासक्रमांचा समावेश नसेल.

from Career News in Marathi: Career News, मराठी Career बातम्या | Maharashtra Times https://ift.tt/38f4CMR
via IFTTT