एकच पोळी खातो, भात सोडलाय... एमपीएसच्या उमेदवारांची व्यथा

म.टा. प्रतिनिधी, अहमदनगर ‘परीक्षा जवळ आलीय म्हणून आम्ही रात्ररात्र जागून अभ्यास करतोय. एकच पोळी खाऊन दिवस काढतोय. झोप येऊ नये म्हणून भात खाणेही सोडले आहे. एवढे करूनही ऐनवेळी परीक्षाच पुढे ढकलल्याने आमचे कष्ट वाया जाणार आहे,’ अशा संतप्त प्रतिक्रिया एमपीएससीची तयारी करणाऱ्या उमेदवारांनी व्यक्त केल्या आहेत. राज्य लोकसेवा आयोगाने रविवारी होणारी पूर्व परीक्षा करोनाचा कारण देत पुढे ढकलली आहे. यामुळे संतप्त झालेल्या उमेदवारांनी रस्त्यावर उतरून आपल्या भावना व्यक्त केल्या आहेत. नगरमध्ये शहर जिल्हा काँग्रेसचे अध्यक्ष किरण काळे यांच्या नेतृत्वाखाली मोर्चा काढण्यात आला. काही काळ उमेदवारांनी रास्ता रोको करून दिल्लीगेट येथे निदर्शने केली. सरकार आणि राज्यसेवा आयोगाच्या विरोधात घोषणाबाजी करण्यात आली. परीक्षा पुढे ढकलण्यात आल्याने उमेदवारांना संताप अनावर झाला आहे. त्यांच्या भावना त्यांनी बोलून दाखविल्या. एक उमेदवार म्हणाला, ‘परीक्षा जवळ आल्याने आम्ही आठ आठ दिवस झोपलो नाही. चार तास झोपून इतर वेळ अभ्यासाला देत आहोत. पुण्यात राहूनही तयारी केली. यासाठी मोठा खर्च झाला आहे. परीक्षा जवळ आल्याने आणखी जोमाने अभ्यासाला लागलो होतो. एक एक पोळी खाऊन उपाशीपोटी अभ्यास करत आहोत. रात्री झोप येऊ नये म्हणून भात खाणे बंद केले. खाणावळ, राहण्याच्या, क्लासचा, पुस्तकांचा खर्च होतच आहे. मात्र, ऐनवेळी परीक्षा रद्द करण्याचा निर्णय चुकीचा आहे. एक तर तो आधीच जाहीर करा, म्हणजे आणचा खर्च आणि कष्ट वाचले असते.’ दुसरा उमेदवार म्हणाला, ‘मागील दोन वर्षे ही परीक्षा पुढे ढकलण्यात आली आहे. आता आमची खर्च करण्याची क्षमता संपली. पदवी घेऊनही बराचकाळ बेरोजगार आहोत. स्पर्धा परीक्षेची तयारी करतोय म्हणून घरचे पैसे देत होते. आता ते तरी किती दिवस पैसे देणार. नोकरी नाही आणि परीक्षाही नाही, अशा पेताच आम्ही सापडलो आहोत. त्यामुळे आमची विनंती आहे की परीक्षा ठरल्यावेळी होऊ द्या.’ काँग्रेसचे काळे म्हणाले, ‘ही निर्णय अन्यायकारक आहे, आम्ही त्याचा निषेध करतो. या उमेदवारांनी आमच्याशी संपर्क साधला. त्यामुळे आम्ही त्यांच्यासोबत आंदोलनात उतरलो आहोत. हे सर्व विद्यार्थी गरीब कुटुंबातील आहेत. अधिकारी होण्याची स्वप्न उराशी बाळगून पोटाला चिमटा घेत ते तयारी करीत आहेत. त्यामुळे परीक्षा रद्द न करता योग्य ती काळजी घेऊन परीक्षा घेण्याची परवानगी घेण्याची आमची मागणी आहे. यासाठी महसूलमंत्री बाळासाहेब थोरात यांच्या माध्यमातून आम्ही पाठपुरावा करणार आहोत.’

from Career News in Marathi: Career News, मराठी Career बातम्या | Maharashtra Times https://ift.tt/3bEkB9k
via IFTTT