MPSC Exam: उमेदवारांसाठी हेल्पलाइन आयोगासाठी ठरतेय डोकेदुखी!

MPSC Exam 2020: महाराष्ट्र लोकसेवा आयोगाची परीक्षा येत्या रविवारी १४ मार्च २०२१ रोजी आयोजित करण्यात आली आहे. परीक्षेला बसलेल्या उमेदवारांच्या मदतीसाठी आयोगाने टोल फ्री क्रमांकावर मदत केंद्रे सुरू केली आहेत. मात्र ही हेल्पलाइन सेवा उमेदवारांच्या मदतीपेक्षाही आयोगासाठी डोकेदुखी ठरू लागली आहे. काही उमदेवार या क्रमांकांवर चक्क कर्मचाऱ्यांना धमकावत असल्याचे किंवा अर्वाच्च भाषेत बोलत असल्याचे आयोगाच्या निदर्शनास आले आहे. २ मार्च २०२१ पासून राज्य लोकसेवा आयोगाने ही हेल्पलाइन सेवा सुरू केली आहे. मात्र या टोल फ्री क्रमांकांवर मदतीसाठी संपर्क केल्यानंतर काही उमेदवार मदतकेंद्रावरील कर्मचाऱ्यांशी अर्वाच्च भाषेत वाद घातल असल्याचे तसेच कर्मचाऱ्यांना धमकावत असल्याचे निदर्शनास आल्याचे आयोगाने जारी केलेल्या प्रसिद्धीपत्रकात म्हटले आहे. आयोगाने प्रसिद्धीपत्रकात म्हटले आहे की, 'अशा प्रकारच्या बेशिस्त वर्तणुकीमुळे मदत केंद्र सुरू करण्याच्या आयोगाच्या हेतूस बाधा पोहोचत आहे. मदत केंद्रावरील दूरध्वनी संभाषणाचे ध्वनीमुद्रण (रेकॉर्डिंग) करण्यात येत असल्याने उमेदवारांचे आक्षेपार्ह संभाषण आयोगाच्या कार्यालयाच्या सूचनांचे उल्लंघन समजण्यात येईल शिवाय अशा प्रकारचे बेशिस्त वर्तन आयोगाच्या कर्मचाऱ्यांवर दबाव आणण्याच्या तसेच आयोगाच्या कामात गैरवाजवी हस्तक्षेप करण्याचा प्रयत्न समजून संबंधित उमेदवाराची उमेदवारी रद्द करण्यासह आयोगाच्या स्वेच्छाधिकारानुसार प्रतिबंधात्मक कारवाई प्रस्तावित करण्यात येईल.' आयोगाच्या माहिती तंत्रज्ञान विभागाच्या सहसचिवांनी हे प्रसिद्धीपत्रक जारी केले आहे. आयोगाचे टोल फ्री क्रमांक पुढीलप्रमाणे - १८००-१२३४-२७५ १८००-२६७३-८८९ टोल फ्री क्रमांकावर कोणती माहिती? आयोगाच्या टोल फ्री क्रमांकावर उमेदवारांना ऑनलाइन अर्ज प्रणालीच्या अनुषंगाने येणाऱ्या तांत्रिक अडचणींचे निराकरण तसेच अन्य सर्वसाधारण माहिती देण्यात येत आहे. परीक्षा कधी? राज्य सेवा पूर्व परीक्षा २०२० ही येत्या रविवारी १४ मार्च २०२१ रोजी आयोजित करण्यात आली आहे. करोना महामारी काळात ही परीक्षा पुढे ढकलण्यात आली होती. परीक्षा कक्षात प्रवेश मिळवण्यासाठी ऑनलाइन डाऊनलोड करून प्रिंट घेतलेले मूळ स्वरुपातील प्रवेश प्रमाणपत्र अनिवार्य आहे.

from Career News in Marathi: Career News, मराठी Career बातम्या | Maharashtra Times https://ift.tt/3cwZIMz
via IFTTT