NEET PG 2021 परीक्षा लांबणीवर; नवी तारीख लवकरच

NEET PG 2021 Update: वैद्यकीय पदव्युत्तर पदवी अभ्यासक्रमांच्या प्रवेशांसाठी होणारी नीट पीजी (NEET PG 2021) ही राष्ट्रीय परीक्षा पुढे ढकलण्यात आली आहे. येत्या रविवारी १८ एप्रिल रोजी ही परीक्षा देशभर होणार होती. पुढील तारीख लवकरच जाहीर करण्यात येणार आहे. केंद्र सरकारने हा निर्णय जाहीर केला. केंद्रीय आरोग्यमंत्री डॉ. हर्ष वर्धन यांनी ही माहिती ट्विटरद्वारे जाहीर केली आहे. 'आपल्या तरुण वैद्यकीय विद्यार्थ्यांच्या आरोग्याच्या हिताचा विचार करून हा निर्णय घेतला आहे,' असे हर्ष वर्धन यांनी म्हटले आहे. नुकतेच बुधवारी १५ एप्रिल रोजी NEET PG परीक्षेचे अॅडमिट कार्ड जाहीर करण्यात आले होते. परीक्षेच्या आयोजनाच्या दृष्टीने सर्व तयारी पूर्ण झाली होती. कोविड-१९ सुरक्षेसंबंधी गाईडलाइन्सदेखील जारी झाल्या होत्या. मात्र देशभरात करोना संसर्गाची स्थिती बिकट होत चालली आहे. त्या पार्श्वभूमीवर हा निर्णय घेण्यात आला आहे. बुधवारी सीबीएसई बोर्डाच्या दहावीच्या परीक्षा रद्द तर बारावीच्या परीक्षा लांबणीवर टाकण्याचा निर्णय घेतला होता. एकामागोमाग एक परीक्षा स्थगित केल्या जात आहेत. दरम्यान, महाराष्ट्र आरोग्य विज्ञान विद्यापीठामार्फत येत्या १९ एप्रिल पासून घेण्यात येणाऱ्या वैद्यकीय विद्यार्थ्यांच्या परीक्षाही पुढे ढकलण्यात आल्या आहेत. या परीक्षा आता जून महिन्यात होणार आहेत.

from Career News in Marathi: Career News, मराठी Career बातम्या | Maharashtra Times https://ift.tt/32lh7mk
via IFTTT