राज्यातील शाळा १७ ऑगस्टपासून सुरू करण्याच्या निर्णयाला स्थगिती

कोविड-१९ विषाणू संसर्गाची दुसरी लाट काही अंशी ओसरत असल्याने (Second Wave of Corona) येत्या १७ ऑगस्टपासून राज्यातील शाळा सुरू करण्यासाठी (Schools Reopening) राज्य सरकारने हिरवा कंदिल दाखवला होता. त्यानुसार SOP देखील जाहीर करण्यात आली होती. मात्र टास्क फोर्सने शाळा सुरू करण्याची घाई न करण्याचा सल्ला दिल्याने हा निर्णय तूर्त स्थगित करण्यात आला आहे. म्हणजेच आता १७ ऑगस्टपासून महाराष्ट्रातील शाळा सुरू होणार नाहीत. शालेय शिक्षण विभागाने १७ ऑगस्टपासून शाळा करण्याचा निर्णय घेतला असला तरी मंत्रिमंडळ बैठकीत मात्र टास्क फोर्सशी सल्लामसलत करून शाळेबाबतचा निर्णय घेण्याचे ठरले होते. त्यानुसार काल टास्क फोर्ससोबत प्रशासनाची बैठक पार पडली. यामध्ये टास्कफोर्सच्या सदस्यांनी शाळा सुरू करण्याची घाई करू नये, असा सल्ला देत शाळा सुरू करण्याला विरोध दर्शवला. त्यामुळे सरकारने १७ ऑगस्टपासून शाळा सुरू करण्याच्या निर्णयाला स्थगिती दिली आहे. राज्याचे मुख्य सचिव सीताराम कुंटे यांच्यासोबत झालेल्या बैठकीत टास्क फोर्सच्या सदस्यांनी लगेच शाळा सुरू करण्याला विरोध दर्शवला होता. बुधवारी रात्रीमुख्य सचिव, शिक्षण विभागाचे अधिकारी आणि टास्क फोर्सची याबाबत बैठक पार पडली. या बैठकीत शाळा सुरू करण्याच्या शिक्षण विभागाच्या परिपत्रकाला स्थगिती देण्याचा निर्णय घेण्यात आला. ग्रामीण भागातील इयत्ता पाचवी ते सातवी आणि शहरी भागातील आठवी ते बारावी पर्यंतचे वर्ग सुरू करण्यास परवानगी देण्यात आली होती. मास्क, शारीरिक अंतर, सॅनिटायझरचा वापर, शाळांचे निर्जंतुकीकरण हे नियम शाळांना पाळावे लागतील, ज्या शाळा सुरू होतील अशा संबंधित शाळेतील शिक्षकांची राहण्याची व्यवस्था शक्यतो शाळेच्याच शहरात किंवा गावात करावी; तसेच, शिक्षकांनी सार्वजनिक वाहतूक व्यवस्थेचा वापर करू नये, असे सूचनेत नमूद करण्यात आले होते. मात्र आता हा निर्णय तूर्त लांबणीवर टाकण्यात आला आहे.

from Career News in Marathi: Career News, मराठी Career बातम्या | Maharashtra Times https://ift.tt/3iEPVYZ
via IFTTT