पदवी अभ्यासक्रमातील इंटर्नशिपची माहिती द्या: यूजीसी

म. टा. प्रतिनिधी, नाशिक शिक्षण घेत असतानाच विद्यार्थ्यांना रोजगारसंधी देण्यासाठी विद्यापीठ व महाविद्यालयांनी पदवी अभ्यासक्रमात इंटर्नशिपचा समावेश करण्याकडे लक्ष देण्याची सूचना विद्यापीठ अनुदान आयोगामार्फत () करण्यात आली होती. याबाबतची माहिती दहा ऑक्टोबरपर्यंत पाठवून देण्याची सूचना 'यूजीसी'मार्फत विद्यापीठ, महाविद्यालयांना देण्यात आली आहे. महाविद्यालयातून पदवी घेऊन बाहेर पडलेल्या विद्यार्थ्यांना त्या-त्या क्षेत्रामध्ये योगदान देण्यासाठी तयार करण्यासाठी महाविद्यालये व विद्यापीठांनी पदवी अभ्यासक्रमातच इंटर्नशिपचा समावेश करावा, अशी सूचना 'यूजीसी'मार्फत देण्यात आली होती. याबाबतचे नियोजन व इंटर्नशिपचा आराखडा तयार करण्याबाबत गेल्या वर्षी डिसेंबर महिन्यात 'यूजीसी'ने महाविद्यालये तसेच विद्यापीठांना आदेश दिले होते. परंतु, त्यानंतर याकडे फारसे लक्ष दिले न गेल्याचे निदर्शनास आल्याने आता या आदेशाची योग्य अंमलबजावणी करण्याकडे विशेष लक्ष देण्याची सूचना 'यूजीसी'मार्फत देण्यात आली आहे. पारंपरिक पदवी शिक्षणामध्ये इंटर्नशिप किंवा आर्टिकलशिपचा समावेश करण्याबाबत पुन्हा सूचित करण्यात आले असून, त्याची लवकर अंमलबजावणी करण्याबाबतचे स्मरणपत्र 'यूजीसी'ने जाहीर केले आहे. तसेच असा एखादा अभ्यासक्रम आधीपासून राबविला जात असल्यास त्याची माहितीही 'यूजीसी'कडून मागविण्यात आली आहे. यासाठी गूगल फॉर्म उपलब्ध करून देण्यात आला असून, महाविद्यालये व विद्यापीठांना दहा ऑक्टोबरपर्यंत ही माहिती 'यूजीसी'कडे जमा करावी लागणार आहे.

from Career News in Marathi: Career News, मराठी Career बातम्या | Maharashtra Times https://ift.tt/2ZRwGod
via IFTTT